Дзесяць краін Еўропы далучыліся да ядзернага плану Францыі супраць Расіі
- 26.10.2026, 11:48
Мэта Парыжа — стрымліванне Крэмля.
Парыж прыцягвае дзесяць еўрапейскіх краін да пашырэння французскага ядзернага стрымлівання Расіі на фоне растучых сумневаў у гатоўнасці ЗША абараняць саюзнікаў. План прадугледжвае размяшчэнне французскіх знішчальнікаў Rafale, здольных несці ядзерную зброю, на еўрапейскіх базах, а таксама развіццё сістэм ранняга папярэджання, абароненай сувязі і абмену разведданымі, піша The Wall Street Journal (пераклад — сайт Charter97.org).
Ініцыятыву пад назвай «Перадавое ядзернае стрымліванне» («Forward Deterrence») у сакавіку прадставіў прэзідэнт Францыі Эмануэль Макрон. У яе ўвайшлі Вялікабрытанія, Германія, Польшча, Нідэрланды, Бельгія, Грэцыя, Фінляндыя, Нарвегія, Швецыя і Данія. Краіны Балтыі, найбольш уразлівыя перад расійскай пагрозай, у праект не ўключаныя. Італія адмовілася ўдзельнічаць.
Мэта Парыжа — стварыць для Крэмля дадатковыя рызыкі ў выпадку ваеннага канфлікту з Еўропай. «Гэта стварае для праціўніка новую складанасць, бо дадае яшчэ адзін фактар, які расіяне будуць вымушаныя ўлічваць», — заявіў дарадца Макрона па стратэгічных пытаннях Ксав’е Шатэль.
Францыя мае прыблізна 290 ядзерных боегаловак — значна менш, чым ЗША і Расія. Аднак французскія крылатыя ракеты ASMP-A, якімі абсталёўваюцца Rafale, здольныя паражаць мэты на расійскай тэрыторыі, уключаючы буйныя гарады.
У адрозненне ад амерыканскай праграмы размяшчэння тактычнай ядзернай зброі ў Еўропе, французскі арсенал знаходзіцца пад поўным кантролем Парыжа. Еўрапейскія партнёры не атрымліваюць права ўдзельнічаць у прыняцці рашэнняў аб яго прымяненні.
Прэзідэнт Фінляндыі Аляксандр Стубб заявіў, што Хельсінкі не плануе размяшчаць ядзерную зброю на сваёй тэрыторыі ў мірны час. Пры гэтым удзел у ініцыятыве дазволіць краіне атрымліваць інфармацыю і ўплываць на стратэгічнае планаванне.
Эксперты папярэджваюць, што французскі патэнцыял не заменіць амерыканскія гарантыі бяспекі. Акрамя таго, магчымая перамога правай партыі Марын Ле Пэн на прэзідэнцкіх выбарах у Францыі можа паставіць пад сумнеў надзейнасць новага партнёрства.