Знешні гандаль Беларусі зноў у мінусе

• 26.10.2026, 11:57

Дэфіцыт у гандлі таварамі перавысіў $3,5 млрд.

Па выніках студзеня–жніўня 2026 года адмоўнае сальда знешняга гандлю таварамі і паслугамі Беларусі склала $7,4 млн. Пра гэта сведчаць абноўленыя даныя Нацбанка.

Яшчэ па выніках сямі месяцаў сальда было станоўчым — $147,5 млн.

Агульны знешнегандлёвы абарот за восем месяцаў дасягнуў $75,4854 млрд, павялічыўшыся на 12,8% у параўнанні з аналагічным перыядам мінулага года. Экспарт вырас на 13,4%, да $37,739 млрд, імпарт — на 12,2%, да $37,7464 млрд.

Дэфіцыт у гандлі таварамі дасягнуў $3,5885 млрд, павялічыўшыся толькі за жнівень больш чым на $560 млн. Тавараабарот склаў $60,9431 млрд (+11,6%). Пры гэтым экспарт вырас да $28,6773 млрд (+10,6%), а імпарт — да $32,2658 млрд (+12,5%).

У гандлі паслугамі экспарт перавышае імпарт: $9,0616 млрд супраць $5,4806 млрд. Рост склаў 23,3% і 10,8% адпаведна. Агульны абарот гэтага сегмента дасягнуў $14,5422 млрд — на 18,3% больш, чым годам раней.