Зяленскі намякнуў на магчымую сустрэчу з Пуціным

• 26.10.2026, 13:10

Амерыканцы падавалі сігналы наконт снежня.

Прэзідэнт Украіны Уладзімір Зяленскі лічыць, што сігналам гатоўнасці Расіі да міру можа стаць энергетычнае перамір’е або дамоўленасць пра трохбаковую сустрэчу лідараў. Пра гэта ён заявіў у інтэрв’ю ТСН.

«Энергетычнае перамір’е як першы крок. Я лічу, што гэта сігнал», — сказаў Зяленскі.

Паводле яго слоў, яшчэ адным такім сігналам з боку Крамля магла б стаць дамоўленасць пра сустрэчу на ўзроўні лідараў трох дзяржаў.

«Я лічу, што яна можа адбыцца. Вы памятаеце, амерыканцы падавалі сігналы наконт снежня, наконт пасяджэння G20 у Маямі, у Фларыдзе. Яны атрымалі ад нас адказ па розных каналах, публічных і непублічных. Мы гатовыя, калі расіяне гатовыя», — заявіў прэзідэнт.

Раней паведамлялася, што, паводле слоў памочніка расійскага дыктатара Юрыя Ушакова, магчымасць візіту Уладзіміра Пуціна на снежаньскі саміт «Вялікай дваццаткі» ў Маямі будзе залежаць ад вынікаў сустрэчы лідараў Кітая, Расіі і ЗША на саміце АТЭС.