У Ізраілі праходзяць «лёсавызначальныя» выбары

• 27.10.2026, 17:55

Яўка дасягнула максімуму з 1973 года.

У Ізраілі праходзяць парламенцкія выбары, якія могуць вызначыць палітычную будучыню прэм'ер-міністра Біньяміна Нетаньяху. Яго галоўным супернікам стаў былы начальнік Генеральнага штаба Гадзі Айзенкот. За паўдня прагаласавалі амаль 45% выбарцаў — гэта самая высокая яўка за аналагічны перыяд з 1973 года, піша Associated Press (пераклад — сайт Charter97.org).

Права голасу маюць больш за сем мільёнаў ізраільцян. Нетаньяху, які прагаласаваў у Ерусаліме, назваў гэта «вельмі хвалюючым і лёсавызначальным момантам». Яго прыхільнікі лічаць прэм'ера дасведчаным лідарам, здольным забяспечыць бяспеку краіны. Супернікі абвінавачваюць яго ў зацягванні вайны ў Газе, аслабленні судовай сістэмы і няздольнасці дамагчыся вызвалення закладнікаў.

Айзенкот заклікаў выбарцаў не паддавацца запалохванню і назваў дзейны ўрад «горшым з тых, што калі-небудзь ведала краіна».

Гэта першыя агульнанацыянальныя выбары пасля нападу ХАМАС. Сярод ключавых пытанняў — бяспека, абавязковая ваенная служба для ультраартадаксальных яўрэяў і незалежнасць судовай сістэмы.

Аднак перамога апазіцыі не гарантуе хуткай змены ўлады. Калі ні адзін з палітычных блокаў не атрымае дастатковай падтрымкі для фармавання большасці, краіну чакаюць складаныя кааліцыйныя перамовы, якія могуць зацягнуцца на некалькі тыдняў.

Выбарцам трэба будзе вызначыць не толькі будучага прэм'ера, але і далейшы курс краіны — у бок узмацнення рэлігійных і нацыяналістычных сіл або ўмацавання свецкіх і дэмакратычных інстытутаў.