Сікорскі: Расія рыхтуе правакацыю ў Еўропе «пад чужым сцягам»

• 3.10.2026, 3:30

Кіраўнік МЗС Польшчы выступіў з папярэджаннем.

Расійскі дыктатарУладзімір Пуцін да канца 2026 года можа распачаць супраць краін Захаду «нешта маштабнае», магчыма, правакацыю «пад чужым сцягам». Пра гэта папярэдзіў міністр замежных спраў Польшчы Радослав Сікорскі, піша Rzeczpospolita.

Шэф польскай дыпламатыі падкрэсліў: у Варшавы з розных крыніц ёсць інфармацыя пра тое, што Расія да канца бягучага года рыхтуе «нешта маштабнае». Ён лічыць, што грамадская думка «мае значэнне нават пры дыктатары».

«Пуціну патрэбная падстава для мабілізацыі, таму ён можа арганізаваць правакацыю пад чужым сцягам. Ён скажа расіянам, маўляў: бачыце, на нас нападаюць, значыць, нам трэба правесці мабілізацыю», — выказаў сваё меркаванне міністр.

Кіраўнік МЗС Польшчы не выключыў таксама, што ў найбліжэйшыя месяцы Расія можа справакаваць «гарачую кропку» ў Балтыі, тым больш што ў Нарве (паўночны ўсход Эстоніі) рускія складаюць этнічную большасць, як і ў некаторых гарадах Латвіі, да таго ж Масква даўно хоча зрабіць сухапутны калідор з Беларусі праз Літву ў Калінінградскую вобласць.

Сікорскі ўпэўнены, што пра поўнамаштабнае ўварванне расійскіх войскаў гаворкі не ідзе, бо гэта было б «вар'яцтвам». На яго думку, Масква можа зрабіць нешта такое, што ўскладніць краінам НАТА актываваць 5-ы артыкул аб калектыўнай абароне.