Ахову картэжа Пуціна ўзмацнілі

• 3.10.2026, 8:14

Федэральныя трасы Чалябінскай вобласці закрылі для ўсяго транспарту з 2 па 5 кастрычніка.

Падчас паездкі расійскага дыктатара Уладзіміра Пуціна на ваенныя вучэнні ў Чалябінскую вобласць яго картэж суправаджаў ваенны верталёт. Раней у яго ахове заўважылі сістэму РЭБ і зенітны кулямёт.

Пра гэта паведамляе The Moscow Times.

Падчас паездкі кіроўцаў спынялі перад выездам на трасу, па якой на вялікай хуткасці праходзіла доўгая калона аўтамабіляў. Над ёй завісаў ваенны верталёт.

Расаўтадар закрыў для ўсяго транспарту федэральныя трасы Чалябінскай вобласці з 2 па 5 кастрычніка, спаслаўшыся на вучэнні і прыезд Пуціна.

Ахова расійскага дыктатара заўважна ўзмацняецца ад паездкі да паездкі. Яшчэ вясной у Астане назіральнікі звярнулі ўвагу на аўтамабіль з комплексам РЭБ і браняваны аўтамабіль, на даху якога абсталявалі пазіцыю для кулямётчыка.

Тады лімузін Пуціна суправаджалі каля дваццаці аўтамабіляў і 14 матацыклістаў, а дзяржаўная ахова Казахстана пацвердзіла прыцягненне ваеннай авіяцыі.

Восенню арсенал суправаджэння папоўніўся. Падчас вераснёўскага візіту ў Уладзівасток у калоне ехаў пікап з зенітным кулямётам, а цяпер да наземнай аховы далучылася і паветранае суправаджэнне.

Крэмль узмацняе ахову дыктатара не толькі ў дарозе. Напрыканцы жніўня стала вядома, што Пуцін чацвёрты раз павялічыў штат ахоўнікаў: цяпер яго ахоўваюць больш за 800 супрацоўнікаў Федэральнай службы аховы. За чатыры гады іх колькасць вырасла амаль на сотню.

Паводле дадзеных Financial Times, сур'ёзныя змены ў ахове Пуціна адбыліся пасля таго, як ЗША ліквідавалі вярхоўнага лідара Ірана Алі Хаменеі. У Крамлі занепакоіліся, што сучасныя інструменты штучнага інтэлекту здольныя аналізаваць мільёны гадзін відэа і вызначаць патрэбныя мэты, таму ахову Пуціна давялося перабудаваць.