На Макса Коржа данеслі ў Генпракуратуру Расіі

• 3.10.2026, 9:54

Адну з яго песень патрабавалі праверыць на наяўнасць «дыскрэдытацыі арміі».

Z-актывісты з руху «Сорок сороков» звярнуліся ў Генпракуратуру Расіі з патрабаваннем праверыць трэк беларускага выканаўцы Макса Коржа «З намі ці не» на наяўнасць дыскрэдытацыі расійскай арміі, піша тэлеграм-канал «Осторожно, новости».

Аўтары даносу звярнулі ўвагу нагляднага органа на радкі: «І не патрэбна вайна, яна не патрэбна» і «Яшчэ крыху — глядзіш, сарвешся і падасся ваяваць — тармозі, братуха».

«Даведаліся, што Макс Корж выступае супраць СВА. Тыя, хто ваююць, адкрыта называюць яго здраднікам, які «плявае нам у твар», — цытуе Z-актывістаў тэлеграм-канал «Осторожно, новости».»

Сінгл «З намі ці не» выйшаў у маі 2026 года. Трэк закранае тэмы сяброўства, уцёкаў ад руціны і лішняй інфармацыі. У ім музыкант вядзе дыялог са сваім сябрам, звяртаючыся да яго словамі:

«Столькі ўсюды вакол месца — куды хочаш, кідай косці

Тут зямлі хапае на ўсіх

І не патрэбна вайна, яна не патрэбна».

Нагадаем, у пачатку лета 2022-га Корж выпусціў трэк «Свой дом», які лічыцца антываенным: прынамсі пасля гэтай прэм'еры тур беларуса па Расіі быў адменены.

2 верасня 2023 года Корж даў першы за некалькі гадоў канцэрт у Рызе, на якім заклікаў наведвальнікаў скандаваць «Не вайне».

За дзень да другой гадавіны поўнамаштабнай вайны ва Украіне, 23 лютага 2024 года, на YouTube-канале Макса Коржа з'явіўся трэк «Халодная раніца». У песні ёсць такія радкі:

«Бачу мора магіл,

Пацаны сыходзяць, не дыхаючы

Стройам на нябёсы.

Там няма нацый і не спытаюць пашпарта.

Як мне гэта спыніць, бо разбуджаная галодная багіня — вайна».