Паліна Шарэнда-Панасюк пачала публікаваць інфармацыю пра палачоў рэжыму

• 3.10.2026, 11:27

Зло павінна быць названа — з прозвішчамі, імёнамі, фотаздымкамі.

Былая палітзняволеная, актывістка грамадзянскай кампаніі «Еўрапейская Беларусь» Паліна Шарэнда-Панасюк пачала публікаваць у фэйсбуку інфармацыю пра палачоў рэжыму, якія працуюць у калоніях, паведамляе «Радыё Рацыя».

Паліна называе іх прозвішчы, публікуе фотаздымкі, апісвае іх удзел у катаваннях і прававым бязмежжы ў дачыненні да палітзняволеных жанчын, кажа Паліна Шарэнда-Панасюк:

— Яны фактычна робяць тое, што рабілася падчас сталінскіх рэпрэсій. І пераважная большасць сталінскіх палачоў засталіся бязыменнымі — тыя, хто расстрэльваў, падпісваў прысуды. Больш за тое, у СССР іх лічылі пачэснымі пенсіянерамі, яны атрымлівалі прывілеі, хоць іх рукі былі ў крыві. Зло павінна быць названа злом, з прозвішчамі, імёнамі, фотаздымкамі гэтых людзей, каб гэта стала своеасаблівай прышчэпкай на будучыню ад паўтарэння, ад рэваншу.

Паліна будзе працягваць гэтую справу. Яна заклікае ўсіх палітзняволеных дакументаваць не толькі факты катаванняў, але і абнародаваць інфармацыю пра канкрэтных асоб, што чыняць гэтае зло.