Зяленскі націснуў на Fire Point з-за ракеты

• 3.10.2026, 20:47

Яна павінна дасягнуць Масквы.

На гэтым тыдні Украіна паведаміла пра першае баявое прымяненне ўласнай балістычнай ракеты айчыннай вытворчасці FP-7, далёкасць палёту якой складае каля 250 км.

Прэзідэнт Украіны Уладзімір Зяленскі распавёў, што тэлефанаваў вытворцу, кампаніі Fire Point, каб націснуць на кіраўніцтва і паскорыць завяршэнне работ над мадэллю павялічанай далёкасці FP-9, здольнай дасягнуць Масквы. «Я спытаў у іх: дзе мой FP-9? Нам патрэбны FP-9. І FP-9 будзе (гатовая) гэтай восенню, я ўпэўнены», — заявіў украінскі лідар у інтэрв’ю Reuters.

Ён таксама дадаў, што Украіна падвоіць удары па расійскіх нафтаперапрацоўчых заводах у адказ на новую палітыку авіяўдараў Масквы, скіраваную на тое, каб прымусіць украінцаў пакінуць Кіеў і іншыя гарады.

Паводле слоў Зяленскага, украінская разведка атрымала дакументы, якія сведчаць пра тое, што крамлёўскі дыктатар Уладзімір Пуцін выдаў «новую дактрыну» ваенных удараў па значна больш шырокім коле грамадзянскіх мэтаў напярэдадні зімы.

«Мы бачылі дакументы і ведаем, што яны дазваляюць ім атакаваць інфраструктуру, лагістыку, дарогі, школы, бальніцы, каб прымусіць людзей пакінуць сталіцу, пакінуць розныя гарады, — заявіў Зяленскі. — Гэта і ёсць мэта аперацыі».

Паводле слоў Зяленскага, прычынай такой змены палітыкі стала жаданне Пуціна выглядаць моцным у той час, калі ягоная армія страчвае пазіцыі ў адным з ключавых рэгіёнаў фронту і нясе большыя страты.