Ля Нептуна выявілі тры загадкавыя аб’екты

• 30.10.2026, 14:56

Два з іх ужо прызнаныя траянскімі астэроідамі.

Астраномы выявілі два новыя траянскія астэроіды Нептуна, а таксама патэнцыйна трэці падобны аб’ект.

Абсерваторыя імя Веры Рубін паднесла новы сюрпрыз з вонкавай часткі Сонечнай сістэмы. Астраномы выявілі два новыя траянскія астэроіды, якія рухаюцца следам за Нептунам па адной і той жа арбіце. Магчыма, там знаходзіцца і трэці раней невядомы траянскі астэроід. Вынікі даследавання апублікаваныя ў часопісе The Astrophysical Journal Letters, піша IFLScience.

Траянскія астэроіды — гэта асаблівая група астэроідаў, якая дзеліць адну і тую ж арбіту з некаторымі планетамі Сонечнай сістэмы. Яны знаходзяцца ў гравітацыйна стабільных кропках Лагранжа L4 (перад планетай на яе ж арбіце) і L5 (пазаду планеты). Гэтыя астэроіды ніколі не сутыкаюцца з планетай, бо гравітацыйныя сілы Сонца і планеты ўтрымліваюць іх у раўнавазе. Прасцей кажучы, траянскія астэроіды звяртаюцца вакол Сонца сінхронна з самой планетай.

Зямля мае два траянскія астэроіды, у Урана — мінімум адзін, у Марса — некалькі дзясяткаў, але больш за ўсё траянскіх астэроідаў мае Юпітэр. Таксама некалькі дзясяткаў траянскіх астэроідаў мае Нептун, апошняя планета Сонечнай сістэмы. Астраномы ўсё яшчэ падлічваюць іх дакладную колькасць, але цяпер іх стала больш як мінімум на два аб’екты. А можа нават на тры.

З дапамогай Абсерваторыі імя Веры Рубін астраномы выявілі два новыя траянскія астэроіды, якія атрымалі назвы 2025 MH348 і 2025 NN80, што рухаюцца за Нептунам. Таксама пакуль што кандыдатам у траянскія астэроіды Нептуна з’яўляецца аб’ект 2025 MD138.

Даследаваць групу траянскіх астэроідаў, што рухаюцца следам за Нептунам, няпроста, бо яны знаходзяцца ў такой частцы космасу, дзе іх надзвычай складана заўважыць. І ўсё ж астраномам удалося адшукаць новыя траянскія астэроіды Нептуна дзякуючы магчымасцям новай Абсерваторыі імя Веры Рубін.

Тэлескоп абсерваторыі абсталяваны люстэркам дыяметрам 8 метраў і камерай з дазволам 3200 мегапікселяў. Гэта найбуйнейшая лічбавая камера ў свеце.

Астраномы спадзяюцца, што новая абсерваторыя дазволіць выявіць шмат новых, раней невядомых аб’ектаў, якія хаваюцца ў вонкавай частцы Сонечнай сістэмы.