Прэм'ер Эстоніі адмовіўся стрымлівацца ў рэзкіх выказваннях у адрас Пуціна

• 30.10.2026, 21:00

Крыстэн Міхал мае намер адкрыта гаварыць пра пагрозу з боку Расіі.

Прэм'ер-міністр Эстоніі Крыстэн Міхал не мае намеру адмаўляцца ад рэзкай крытыкі Масквы, як таго, паводле паведамлення агенцтва Reuters, патрабуюць у Вашынгтоне. У інтэрв'ю парталу Delfi у пятніцу, 30 кастрычніка, Міхал заявіў, што Эстонія і надалей будзе адкрыта казаць пра пагрозу з боку Расіі. Паводле яго слоў, ліслівасць перад дыктатарамі вядзе толькі да прыніжэння, а свабода ў такім выпадку ўсё адно будзе страчаная.

- Я не збіраюся стрымлівацца. Пуцін — дыктатар, які забівае жанчын і дзяцей. І будзе працягваць гэта рабіць да таго часу, пакуль яго не прымусяць змяніць курс, — перакананы кіраўнік урада Эстоніі. Паводле сцвярджэння Міхала, ён не атрымліваў з ЗША прамых заклікаў змякчыць рыторыку ў адрас РФ — апошні раз ён сустракаўся з амерыканскім прэзідэнтам Дональдам Трампам летам у Анкары, і тады гэтая тэма не ўзнімалася.