Даказана, што Расія страціла яшчэ адзін знішчальнік Су-57 на аэрадроме Ахтубінск

• 31.10.2026, 11:54

Наступствы бачныя з касмасу.

Расія можа не далічыцца яшчэ аднаго свайго баявога самалёта. Знішчальнік пятага пакалення Су-57 згарэў 29 кастрычніка на аэрадроме Ахтубінск у Астраханскай вобласці. Пра гэта паведамляе Defense Romania са спасылкай на Telegram-канал Absolutely Reliable Source, які апублікаваў спадарожнікавыя здымкі базы.

Паводле папярэдніх звестак, самалёт загарэўся з-за нештатнай сітуацыі, што ўзнікла падчас запуску рухавіка.

Гэта значыць, гэтым разам абышлося без знешняга ўмяшання, і машына ўспыхнула яшчэ да таго, як паспела падняцца ў паветра.

Паводле падлікаў выдання, гэта ўжо чацвёрты вядомы выпадак у 2026 годзе, калі Су-57 быў паражаны або страчаны. Так, напрыканцы красавіка, 25-га чысла, украінскія дроны дабраліся да аэрадрома Шагол у Чалябінскай вобласці і паразілі там адразу два такія знішчальнікі.

Су-57 у Расіі пазіцыянуюць як шматфункцыянальны знішчальнік, здольны атакаваць мэты ў паветры, на зямлі і на моры. Паводле наяўных даных, ён разганяецца прыкладна да 2600 км/гадз і можа несці кіраванае ўзбраенне, у прыватнасці ракеты класа «паветра-паверхня». Серыйну зборку гэтых самалётаў ажыццяўляюць на авіязаводзе ў Камсамольску-на-Амуры.