Прэм’ер Эстоніі адмовіўся стрымлівацца ў рэзкіх словах у адрас Пуціна

• 31.10.2026, 12:17

Палітык адказаў на рэкамендацыі Вашынгтона.

Прэм’ер-міністр Эстоніі Крыстэн Міхал не збіраецца адмаўляцца ад рэзкай крытыкі Масквы, як таго, паводле паведамлення агенцтва Reuters, патрабуюць у Вашынгтоне. У інтэрв’ю парталу Delfi у пятніцу, 30 кастрычніка, Міхал заявіў, што Эстонія і надалей будзе адкрыта казаць пра пагрозу з боку Расіі. Паводле яго слоў, падхалімства перад дыктатарамі вядзе толькі да прыніжэння, а свабода ў такім выпадку ўсё адно будзе страчана.

«Я не збіраюся стрымлівацца. Пуцін — дыктатар, які забівае жанчын і дзяцей. І будзе працягваць гэта рабіць да таго часу, пакуль яго не прымусяць змяніць курс», — перакананы кіраўнік урада Эстоніі. Па сцвярджэнні Міхала, непасрэдна ад ЗША ён не атрымліваў просьбаў змякчыць рыторыку ў адрас РФ — апошні раз ён сустракаўся з амерыканскім прэзідэнтам Дональдам Трампам ўлетку ў Анкары, і тады гэтая тэма не ўзнімалася.

У Міністэрстве абароны Эстоніі на запыт Delfi адмовіліся каментаваць патрабаванні ЗША адмовіцца ад жорсткіх заяваў у адрас Расіі, спаслаўшыся на тое, што публікацыя Reuters абапіраецца на ананімныя крыніцы.

У Літве заявілі, што не атрымлівалі просьбаў ад ЗША змякчыць рыторыку

У канцылярыі прэзідэнта Літвы Гітанаса Наўседы заявілі, што ні ён, ні ягоныя памочнікі не атрымлівалі ніякіх запытаў ад саюзнікаў адносна заяваў пра Расію, перадае літоўская медыякампанія LRT.

Раней у той жа дзень агенцтва Reuters паведаміла, што супрацоўнікі Пентагона падчас двухбаковых сустрэч з прадстаўнікамі Латвіі, Літвы і Эстоніі параілі ім устрымацца ад рэзкіх выказванняў пра пагрозу з боку Расіі, патлумачыўшы гэта тым, што гэта можа падарваць бяспеку кантынента. У прыватнасці, паводле звестак агенцтва, намеснік міністра абароны ЗША па палітычных пытаннях Элбрыдж Колбі нядаўна заявіў прадстаўніку адной з краін Балтыі, што не варта «дражніць Расію». Выказванне Міхала, які параўнаў Пуціна з пацуком, загнаным у кут, Колбі прывёў як прыклад «няўдалай рыторыкі».