Дэбютаваў першы кітайскі фільм пра ШІ
- 31.10.2026, 13:11
Стужка натхнёная археалагічнымі знаходкамі старажытнай цывілізацыі Саньсіндуй.
Пакуль першая частка эпапеі Ілона Маска, створаная з дапамогай штучнага інтэлекту, «Адысэя», расчаравала гледачоў у ЗША, у Кітаі гучны касавы правал пацярпеў першы паўнаметражны ШІ-фільм, які выйшаў у шырокі пракат.
Навукова-фантастычны трылер Sanxingdui: Future Past, які выйшаў на экраны на мінулым тыдні, сабраў каля 198 000 долараў, паведамляе інфармацыйнае агенцтва Agence France-Presse.
У розных краінах і раней выходзілі асобныя ШІ-фільмы ў абмежаваным пракаце, аднак з больш як 10 000 сеансаў у дзень прэм'еры Future Past стаў першым падобным праектам, які выйшаў у паўнавартасны нацыянальны пракат з празрыстымі касавымі зборамі. Стартовыя зборы фільма склалі ўсяго 12 % ад яго бюджэту ў 10 мільёнаў юаняў (каля $1,5 млн).
Генеральны дырэктар кампаніі-вытворцы Bona Film Group Цзян Дэфу у інтэрв'ю кітайскаму выданню Yuli адзначыў, што фільм усё роўна стаў важным досведам:
«Мы першыя, хто гэта паспрабаваў, першыя, хто атрымаў дазвол на к інапракат, і першыя, чыя праца была ацэненая гледачамі. Лічу, што гэта было зусім няпроста».
Адзін з першых гледачоў так пракаментаваў якасць стужкі: «З пункту гледжання якасці, у параўнанні з вытворчасцю, якую ажыццяўляюць людзі, яна па-ранейшаму не дацягвае».
Нягледзячы на гэта, няўдача адной стужкі не спыняе агульную тэндэнцыю. Паводле выдання Fortune, у Кітаі штучны інтэлект амаль цалкам захапіў сегмент кароткаметражных анлайн-серыялаў (мікрадрам), дзе 95 % кантэнту ствараецца алгарытмамі.
100-хвілінны фільм Future Past натхнёны археалагічнымі знаходкамі старажытнай цывілізацыі Саньсіндуй. Па іроніі лёсу, сюжэт распавядае пра будучыню, дзе звышінтэлектуальны ШІ распаўсюдзіўся па ўсёй планеце, а чалавецтва перадала кіраванне алгарытмам, што ўрэшце пагрузіла свет у маштабны крызіс.
Раней у абмежаваны пракат выходзілі і іншыя фільмы, створаныя з дапамогай штучнага інтэлекту: індыйскі 95-хвілінны мюзікл Love You у маі 2025 года і малайзійскі фільм Pirate Queen: Zheng Yi Sao ў студзені. У ЗША рэліз першага паўнаметражнага ШІ-фільма з рэйтынгам R пад назвай Gods Don’t Give Gifts ад ютубера Gossip Goblin запланаваны на 4 снежня.