Лукашэнка дае прызнальныя паказанні

• 31.10.2026, 16:56

Дыктатар чарговы раз пацвердзіў, што адмовіўся ўводзіць у Беларусі каранцін.

Лукашэнка на адкрыцці ў Мінску новай Гарадской клінічнай інфекцыйнай бальніцы зноў успомніў пра COVID. І нават зрабіў з пандэміі 2020-га пэўныя высновы. Вядома, не прызнаўшы адказнасці за смерці дзясяткаў тысяч беларусаў, піша planbmedia.io.

«Вы памятаеце гэтую так званую пандэмію, якую мы разам з вамі перажылі. Нягледзячы на тое, што адзіная дзяржава ў свеце, якая пайшла сваім шляхам і ад гэтага выйграла. Мы выратаваліся, не пабегшы за іншымі, якія ўводзілі поўную ізаляцыю, раздавалі «верталётныя грошы». Ні таго, ні другога мы сабе дазволіць не маглі», — сказаў ён.

«Але мы зрабілі адпаведныя высновы, калі мы кідаліся з боку ў бок, шукалі месцы для інфекцыйных хворых. На шчасце, не знішчылі ў раённых цэнтрах і абласцях інфекцыйныя аддзяленні і бальніцы. Але мы бачылі, што ў такіх мегаполісах, як Мінск, нам якраз не хапала такога кампактнага месца, дзе можна было б размясціць гэтых хворых».

Цяперашняя бальніца — і ёсць тая праца над памылкамі.

«Мы вынеслі ўрокі з нядаўняй пандэміі. Мы нічога не адкідалі, не адмахваліся. Бачылі і свае недахопы. І павінны ў любы час быць гатовыя не дапусціць паўтарэння тых памылак і недахопаў, якія калісьці былі», — працягваў Лукашэнка.

І, вядома, ён запатрабаваў забяспечыць бальніцы эфектыўную загрузку. У ёй ёсць некалькі ізаляваных адзін ад аднаго блокаў, дзе можна пры неабходнасці лячыць не толькі інфекцыйных хворых, але і любых іншых пацыентаў, лічыць галоўны эксперт па пандэміях.

«Гэтыя будынкі не павінны пуставаць. Яны павінны эфектыўна працаваць і даваць аддачу, — заявіў Лукашэнка. — У сувязі з гэтым мы абмяркоўвалі праблему, у нас ёсць перагібы. Мы яшчэ раней пачалі будаваць замест бальніц «палацы». Ведаеце, бальніца — гэта не курорт. Ідэальна павінна быць у аперацыйных і рэанімацыйных, палатах і аддзяленнях. Там павінна быць вышэй за сусветны ўзровень. І на гэта грошай мы шкадаваць не будзем. Але ўсё астатняе — гэта, яшчэ раз падкрэсліваю, не курорт».

Кошт «асаблівага шляху»

Нагадаем, у Беларусі настойваюць, што яе «асаблівы шлях» — адмова ад «кавіднага вар’яцтва» — дазволіў захаваць эканоміку і перажыць пандэмію ледзь не лепш за самыя паспяховыя краіны Еўропы.

Праверыць гэтыя заявы ўдалося дзякуючы групе беларускіх медыкаў пры ўдзеле Фонду медыцынскай салідарнасці BYMEDSOL і праекта «Белыя Халаты». Афіцыйная беларуская статыстыка паведамляла пра 7 118 памерлых ад COVID-19 за ўвесь час пандэміі. Але гэта тыя, каму афіцыйна паставілі COVID-19 і затым запісалі яго прычынай смерці.

Даследаванне дае зусім іншую, рэальную, карціну. Яна грунтуецца на звышсмяротнасці, якая ўлічвае і памерлых без тэсту на кавід, і тых, хто памёр з-за звязанай з пандэміяй перагрузкі сістэмы аховы здароўя.

Аўтары параўналі штомесячную смяротнасць у пандэмійныя гады з сярэднімі паказчыкамі 2015–2019 гадоў. За чатыры асноўныя хвалі пандэміі яны атрымалі каля 97 026 звышмерных смерцяў.

Розніца з афіцыйнай кавіднай статыстыкай — больш чым у дзесяць разоў. Праўда, гэта не азначае, што кожны з гэтых 97 тысяч чалавек памёр непасрэдна ад каранавіруса. Частка смерцяў магла быць звязана з перагрузкай сістэмы аховы здароўя, немагчымасцю атрымаць планаванае лячэнне, позняй шпіталізацыяй і іншымі наступствамі пандэміі. Але лічба паказвае агульную дэмаграфічную цану таго, што адбывалася.

У сакавіку 2020 года Лукашэнка разважаў пра гарэлку, лазню і трактар, які «вылечыць усіх». На нарадзе 19 кастрычніка 2021 года, у разгар смяротнай хвалі Delta, ён крытыкаваў уведзены Міністэрствам аховы здароўя абавязковы масачны рэжым. І нават называў медыцынскія маскі «наморднікамі». (Цікава, што за пару гадоў большасць спасылак на афіцыйныя прапагандысцкія крыніцы з цытатамі гэтай нарады старанна падчышчаныя, адзначаюць аўтары даследавання). Урад Швецыі ў гэты ж час гаварыў пра надзвычайную небяспеку захворвання, актыўна пераконваў грамадзян сваёй краіны праяўляць адказнасць, захоўваць бяспечную дыстанцыю і масачны рэжым.