Зяленскі распавёў, калі будзе гатовая балістычная ракета, здольная дасягаць Масквы

• 4.10.2026, 10:25

Прэзідэнт Украіны патэлефанаваў у кампанію Fire Point.

Пасля першага паспяховага баявога прымянення ўласнай балістычнай ракеты FP-7 з далёкасцю каля 250 км Уладзімір Зяленскі чакае мадэль, здольную дасягаць Масквы. Пра гэта ён заявіў у інтэрв'ю агенцтву Reuters.

Прэзідэнт Украіны распавёў, што патэлефанаваў вытворцу — кампаніі Fire Point — і запатрабаваў ад кіраўніцтва паскорыць завяршэнне работ над мадэллю з большай далёкасцю — FP-9, якая, паводле заявы кампаніі, зможа дасягаць Масквы.

«Я сказаў ім: “Дзе мая FP-9?” — прамовіў Зяленскі з усмешкай. — “Нам патрэбная FP-9. І FP-9 будзе гатовая гэтай восенню — я ўпэўнены”».

Украінскія афіцыйныя асобы папярэджваюць, што Расія накапіла сотні балістычных ракет напярэдадні чаканага зімовага наступу супраць аб'ектаў электра- і водазабеспячэння. Мінулай зімой — самай цяжкай за ўвесь час вайны — расійскія ўдары пакідалі значную частку краіны без электрычнасці і ацяплення на некалькі дзён запар.

З лета 2026 года Масква таксама пачала штодня запускаць дзясяткі хуткіх і адносна танных рэактыўных дронаў-«шахедаў» па Украіне: сілам супрацьпаветранай абароны цяжка спраўляцца з перахопам, паколькі іх уласныя дроны-перахопнікі занадта павольныя.

Зяленскі паведаміў, што Украіне даводзілася ў значнай ступені абапірацца на знішчальнікі — F-16 і МіГі — для знішчэння каля 60% расійскіх рэактыўных дронаў, аднак запасы 20-мм боепрыпасаў для самалётаў на зыходзе.

Кіеў тэрмінова працуе над іншымі рашэннямі, у тым ліку над нарашчваннем магчымасцяў радыёэлектроннага падаўлення, сказаў ён. У другой палове кастрычніка 2026-га Украіна атрымае першую партыю невялікіх і танных зенітных ракет, здольных паражаць новыя «шахеды».

На мінулым тыдні Зяленскі паведаміў, што Украіна распрацоўвае пяць мадэляў новых дронаў-перахопнікаў, здольных збіваць рэактыўныя «шахеды». Выйшаўшы са сустрэчы з кіраўніцтвам абароннага ведамства, ён распавёў, што выпрабаванні дзвюх з гэтых мадэляў паказалі сціплы вынік — каля 30%.

«Нам давядзецца маштабаваць гэта, — сказаў ён. — Спадзяюся, што з усімі гэтымі рэчамі, з усімі гэтымі элементамі мы знойдзем выйсце».

Таксама прэзідэнт адзначыў, што Украіна ўзмоцніць удары па расійскіх нафтаперапрацоўчых заводах. Гэта будзе адказ на новую палітыку авіяўдараў Масквы, накіраваную на тое, каб прымусіць людзей пакінуць Кіеў і іншыя гарады. Аднак мірных жыхароў Узброеныя сілы Украіны атакаваць не будуць.