Трамп прызначыў «цара ШІ» і даў яму першае даручэнне

• 4.10.2026, 15:39

Кураваць пытанні ШІ будзе кіраўнік нацыянальнай выведкі ЗША.

Дырэктар нацыянальнай выведкі ЗША Джэй Клэйтан стане «царам ШІ» ў адміністрацыі прэзідэнта Дональда Трампа. Ён узначаліць новую працоўную групу Белага дома, якая зоймецца пытаннямі развіцця штучнага інтэлекту, паведамляе The Wall Street Journal.

«Прэзідэнт папрасіў сабраць групу, якая павінна забяспечыць менавіта тое, пра што ён казаў: каб мы заставаліся лідарамі ў галіне звышінтэлекту і каб інтарэсы амерыканскага народа былі на першым месцы», — адзначыў Клэйтан.

Па словах крыніц выдання, асноўную працу па кантролі рызык па-ранейшаму будзе выконваць сама галіна ШІ, аднак працоўная група будзе ўзаемадзейнічаць з прадстаўнікамі індустрыі для выяўлення рызык і магчымасцяў.

«Я чакаю, што механізмы будуць выпрацаваныя ў працэсе дыялогу — так, як гэта адбываецца ў іншых галінах», — сказаў Клэйтан WSJ, дадаўшы, што працоўная група прааналізуе дзейнае заканадаўства і абмяркуе магчымыя меры, якія можа прыняць Кангрэс.

Як удакладняе CNBC, новая структура пад кіраўніцтвам «цара ШІ» будзе называцца «Сілы звышінтэлекту» (Super Intelligence Force, SI). Яна павінна на працягу 120 дзён вывучыць рызыкі і магчымасці штучнага інтэлекту і падрыхтаваць рэкамендацыі адносна ролі федэральнага ўрада ў гэтай сферы.

Клэйтан узначальвае нацыянальную выведку ЗША, якая аб’ядноўвае 18 ведамстваў, і з’яўляецца галоўным дарадцам прэзідэнта па пытаннях выведкі. На слуханнях па яго зацвярджэнні ў ліпені ён заявіў, што штучны інтэлект адначасова з’яўляецца для выведывальнай супольнасці і магчымасцю, і пагрозай.