На Актобэрфэсце зафіксавалі новы рэкорд наведвальнасці

• 4.10.2026, 16:16

Свята наведалі каля 7,4 млн чалавек.

Мюнхенскі Актобэрфэст у гэтым годзе наведалі каля 7,4 млн чалавек — больш, чым калі-небудзь за ўсю гісторыю фестывалю. Папярэдні рэкорд складаў 7,2 млн гасцей і быў усталяваны ў 2023 годзе, перадае Bild.

191-ы Актобэрфэст, які заканчваецца сёння, цягнуўся 16 дзён. Асабліва шмат людзей прыйшло ў буднія: у першы тыдзень наведвальнасць з панядзелка па чацвер вырасла на 18,5%, а ў другі — на 28,9% у параўнанні з мінулым годам.

Павялічылася і спажыванне піва: наведвальнікі выпілі каля 6,7 млн літровых куфляў — на 2,7% больш, чым у 2025 годзе. Продажы ежы павялічыліся прыкладна на 2–3%.

На асобны «гістарычны Актобэрфэст» (Oide Wiesn) прыйшлі 447 тысяч чалавек супраць 360 тысяч годам раней.

Пры гэтым свята аказалася азмрочана некалькімі няшчаснымі выпадкамі. У апошні дзень 47-гадовы супрацоўнік атракцыёна атрымаў цяжкія траўмы, яму спатрэбілася рэанімацыя на месцы. Раней у верасні ў выніку розных інцыдэнтаў на атракцыёнах загінулі два чалавекі.