Мерц з Кіева звярнуўся да Пуціна

• 4.10.2026, 16:26

Канцлер Германіі заклікаў дыктатара РФ спыніць «бяссэнсоўную вайну».

Канцлер Германіі Фрыдрых Мерц, які 4 кастрычніка прыбыў у Кіеў з неабвешчаным візітам, аглядаючы наступствы расійскіх удараў, звярнуўся да дыктатара Расіі і заклікаў спыніць «бяссэнсоўную вайну». Яго словы цытуе dpa.

У сваім звароце да кіраўніка Крамля ён заявіў пра гатоўнасць да перамоваў, але «варварскія напады на грамадзянскае насельніцтва Украіны павінны спыніцца» і «павінна змоўкнуць зброя».

Разам з прэзідэнтам Украіны Уладзімірам Зяленскім Мерц ушанаваў памяць загінулых.

Таксама ён наведаў Нацыянальную акадэмію навук у Кіеве, разбураную ўдарам расійскага дрона; відэа апублікаваў кіраўнік дзяржавы.

«Цэнім тое, што Фрыдрых Мерц быў сёння з намі тут, нягледзячы на паветраную трывогу і абсалютна варварскіх суседзяў — расіян, якія з самай раніцы атакуюць горад. Гэта важны і мужны сігнал ад канцлера асабіста і ўсёй Германіі. Дзякуй, Фрыдрых», — напісаў у Telegram Зяленскі.

На відэа чутна, як падчас візіту ў будынак НАН раздаецца сігнал паветранай трывогі. З раніцы РФ атакуе Кіеў, акупанты нанеслі ўдар па Паўночным мосце, таксама ў Дарніцкім раёне абломкі БПЛА ўпалі на тэрыторыю школы і пашкодзілі прыпаркаваны аўтамабіль. У сталіцы ёсць пацярпелыя.

У гэты ж дзень Мінабароны РФ пагразіла ўзмацненнем удараў па Украіне. Напярэдадні прэс-сакратар МЗС РФ Марыя Захарава заявіла, што Узброеныя сілы РФ «будуць працягваць наносіць масіраваныя ўдары адплаты» па Украіне і што тыя дыпламаты і замежнікі, якія ігнаруюць папярэджанні РФ, самі «свядома падвяргаюць свае жыцці смяротнай небяспецы».