«Белпошта» запусціла новую паслугу

• 4.10.2026, 18:52

Грошы за пасылкі можна атрымліваць без наведвання паштовага аддзялення.

«Белпошта» запусціла новы сэрвіс «Баланс» для адпраўнікоў пасылак з накладным плацяжом. Цяпер грошы за адпраўленне можна атрымліваць без абавязковага візіту ў паштовае аддзяленне.

Пры афармленні пасылкі адпраўнік зможа выбраць, як атрымаць накладны плацёж: наяўнымі ў аддзяленні або з аўтаматычным залічэннем на «Баланс».

Грошы з «Балансу» можна перавесці на банкаўскую картку любога беларускага банка. Імі таксама можна аплачваць афармленне і перасылку адпраўленняў праз прылады самаабслугоўвання QR-box.

Спачатку трэба прайсці ідэнтыфікацыю. Анкетныя дадзеныя можна запоўніць у асабістым кабінеце на сайце «Белпошты» або ў мабільным прыкладанні.

Пасля гэтага давядзецца адзін раз прыйсці ў любое аддзяленне «Белпошты» з дакументам, які сведчыць асобу, каб супрацоўнік пацвердзіў дадзеныя.

Затым карыстальніку трэба прыняць умовы пагаднення і дагавора. Пасля падключэння сэрвісам можна карыстацца кругласутачна.

Функцыя «Баланс» з’явілася і ў новай версіі мабільнага прыкладання «Белпошты». У апісанні абнаўлення аператар асобна адзначае, што грошы за накладны плацёж могуць паступаць непасрэдна на «Баланс», адкуль іх можна пераводзіць на банкаўскую картку або выкарыстоўваць для аплаты паслуг.

Пры гэтым «Белпошта» не ўдакладняе, ці прадугледжана камісія за перавод грошай з «Балансу» на картку.