Трамп абвясціў пра стварэнне Сіл суперінтэлекту

• 4.10.2026, 19:15

Кіраваць новай структурай будзе ў тым ліку дырэктар нацыянальнай выведкі ЗША.

Прэзідэнт ЗША Дональд Трамп абвясціў пра стварэнне Сіл суперінтэлекту (Super Intelligence Force, SIF).

«Пасля гістарычнага пагаднення ў Белым доме пра суперінтэлект, дзе найважнейшыя тэхналагічныя кампаніі свету сабраліся разам і пацвердзілі свае абавязкі перад амерыканскім народам, я абвяшчаю пра стварэнне Сіл суперінтэлекту», — напісаў прэзідэнт ЗША ў сацсетцы Truth Social.

Паводле слоў Трампа, SIF будзе каардынаваць працу федэральнага ўрада ў сферы суперінтэлекту, а таксама ўзаемадзеянне ўладаў са спажыўцамі, грамадскімі групамі, рэлігійнымі арганізацыямі, пастаўшчыкамі крытычнай інфраструктуры і кампаніямі, што займаюцца суперінтэлектам.

Кіраваць новай структурай будуць дырэктар нацыянальнай выведкі Джэй Клэйтан, старшыня Федэральнай гандлёвай камісіі Эндру Фергюсан, намеснік міністра вайны па даследаваннях і распрацоўках і галоўны тэхналагічны дырэктар Эміль Майкл, а таксама дырэктар Упраўлення па кіраванні персаналам Скот Купор. SIF будзе падсправаздачная Трампу і кіраўніцы апарату Белага дома С’юзі Уайлс.