Foreign Policy: Марскія агуркі сталі ценявой валютай наркакартэляў у Мексіцы

• 4.10.2026, 19:40

Кошт асобных відаў гэтага азіяцкага далікатэсу дасягае $3 тыс. за 1 кг.

Некаторыя віды марскіх агуркоў сталі ценявой валютай у крымінальным свеце. Пра гэта паведамляе Foreign Policy.

Кошт асобных відаў гэтага азіяцкага далікатэсу дасягае $3 тыс. за 1 кг. У Азіі на іх захоўваецца высокі попыт, таму яны сталі зручнай своеасаблівай валютай для ценявых разлікаў.

Паводле звестак выдання, адзін з былых супрацоўнікаў Памежнай службы ЗША Сезар Далео стаў пасярэднікам паміж кітайскімі вытворцамі хімічных рэчываў і мексіканскімі наркакартэлямі: у адзін бок перавозілі прэкурсоры для наркотыкаў, а ў зваротным — у якасці аплаты — рэдкі від марскога агурка Isostichopus fuscus, які знаходзіцца пад аховай. Далео злавілі і за кантрабанду асудзілі на 30 месяцаў.

Незаконны гандаль далікатэсам вядзецца не толькі ў Мексіцы, але і ў Індыі. Промысел дазволены на Шры-Ланцы, таму туды і перапраўляюць незаконна здабытыя ў Індыі марскія агуркі, а затым іх перавозяць у Ганконг або мацярыковы Кітай.

Марскія агуркі з'яўляюцца далікатэсам у краінах Азіі, найперш у Кітаі. Іх таксама лічаць сімвалам дастатку і статусу.