Украінскі МіГ-29 збіў расійскі рэактыўны дрон ракетай узору 1982 года

• 4.10.2026, 20:37

Відэафакт.

У сеціве апублікаваныя кадры начнога перахопу расійскага рэактыўнага беспілотніка ўкраінскім знішчальнікам МіГ-29. Пілот мадэрнізаванага МіГ-29МУ1 знішчыў мэту ракетай блізкага радыуса дзеяння «Р-60М».

Знішчальнік выконваў задачу супрацьпаветранай абароны. На апублікаваных кадрах бачна, як самалёт заходзіць у хвост дрона, выпускае ракету, якая сама наводзіцца на мэту і праз 3 секунды падрывае дрон у небе.

Адразу пасля выбуху пілот адводзіць знішчальнік у бок, ухіляючыся ад аскепкаў.

Р-60М — савецкая маламерная кіраваная ракета класа «паветра — паветра». Яна аснашчана інфрачырвонай галоўкай саманавядзення, якая рэагуе на цеплавое выпраменьванне мэты, перадусім рухавіка. Распрацавана ў СССР у 1973 годзе. Мадэрнізаваная версія Р-60М была створана і прынята на ўзбраенне ў 1982 годзе.

Версія Р-60М — гэта пазнейшая мадыфікацыя з больш адчувальнай цеплавой галоўкай саманавядзення і павялічанай баявой часткай.

Гэта ракета ўваходзіць у склад узбраення МіГ-29 разам з больш сучаснай Р-73.

Украінскія МіГ-29 ужо прымяняліся для знішчэння рэактыўных расійскіх беспілотнікаў. У верасні Паветранае камандаванне «Цэнтр» публікавала кадры такога перахопу, адзначаючы, што ў лётчыка застаецца мала часу на выяўленне, прыцэльванне і паражэнне мэты.