ЗША тэрмінова вывелі з Вялікабрытаніі ўсе бамбавікі B-1

• 5.10.2026, 8:52

Яны вярнуліся ў ЗША.

Дванаццаць амерыканскіх бамбавікоў, якія выкарыстоўваліся для ўдараў па Іране, вярнуліся ў ЗША. Гэта адбылося праз тыдзень пасля затрымання каля авіябазы некалькіх мужчын, якіх падазраюць у падрыхтоўцы тэрактаў.

Усе амерыканскія бамбавікі B-1B Lancer пакінулі базу Каралеўскіх ваенна-паветраных сіл Фэрфорд у Вялікабрытаніі, паведамляе Reuters са спасылкай на Пентагон.

«Нягледзячы на тое, што меркаванні аператыўнай бяспекі не дазвалялі нам пацвярджаць перамяшчэнне нашай тэхнікі і сіл у рэальным часе, цяпер мы можам паведаміць, што ўсе амерыканскія бамбавікі, размешчаныя на базе Фэрфорд, вярнуліся на свае базы ў Злучаных Штатах», — заявіў прадстаўнік Пентагона.

На брытанскай авіябазе знаходзіліся 12 бамбавікоў B-1. З яе яны выляталі для нанясення амерыканскіх удараў па іранскіх ракетных аб'ектах.

За тыдзень да гэтага каля Фэрфорда затрымалі некалькіх мужчын паводле заканадаўства аб выбуховых рэчывах. З навакольных дамоў эвакуявалі жыхароў.

Прэм'ер-міністр Вялікабрытаніі Энды Бёрнэм заявіў, што ў Лондана ёсць «важкія прыкметы» датычнасці Ірана да меркаванай змовы супраць базы. Тэгеран адхіліў гэтыя абвінавачанні як беспадстаўныя. Дональд Трамп сцвярджаў, што падазраваныя планавалі нанесці «вялікую шкоду».