Наталля Дуліна адказала Марыі Калеснікавай

• 5.10.2026, 9:25

Перамовы з Лукашэнкам — так сабе дыпламатыя.

Былая палітзняволеная Наталля Дуліна пракаментавала допіс іншай былой палітзняволенай Марыі Калеснікавай, якая заклікала да перамоваў з Лукашэнкам.

— Паводле традыцыі хачу адрэагаваць на допіс Марыі Калеснікавай і пракаментаваць тыя пункты, у якіх Марыя абгрунтоўвае магчымасць і неабходнасць перамоваў з Лукашэнкам, — піша Дуліна. — Першы пункт.

Марыя піша: «Перамовы — не адмаўленне ад прынцыпаў. Санкцыі ствараюць неабходны ціск. Перамовы павінны ператвараць яго ў вынік: вызваленых людзей, вяртанне дадому да сваіх сем’яў, зніжэнне рэпрэсій».

Марыя, прынцыпы тут ні пры чым, паверце. Для тых, хто выступае супраць перамоваў, у першую чаргу гэта аналіз паводзінаў Лукашэнкі і прагноз вынікаў гэтых перамоў. Спадзяюся, што Вы ведаеце, колькі перамоваў адбылося за гэтыя трыццаць з лішнім гадоў з Лукашэнкам. І чым яны заканчваліся.

Лукашэнка — картачны шулер... Дастаткова ўспомніць нахабнае парушэнне дамоўленасцяў у 1996 годзе паміж беларускім парламентам і Лукашэнкам, які падманам дасягнуў свайго, разагнаўшы парламент. Калі не памятаеце, пацікаўцеся. Вось з гэтага ўсё і пачалося.

Не варта нават спрабаваць дамаўляцца — гэта скончыцца чарговым падманам. Дастаткова паглядзець, Марыя, у якіх умовах цяпер апынуліся вызваленыя, што засталіся ў Беларусі, якія не змаглі і, чорт вазьмі, проста не захацелі пакідаць свой дом.

Далей. Пункт 2:

«Дыпламатыя — не слабасць і не ўступка. Я сама сёння на свабодзе ў тым ліку таму, што гэты інструмент спрацаваў. Для мяне гэта не тэорыя».

Сёння перамовы з Лукашэнкам — так сабе дыпламатыя. І працуе яна, прама скажам, вельмі своеасабліва. Я зноў-такі маю на ўвазе Лукашэнку. Свежы прыклад — 25 вывезеных за мяжу і дзясяткі не выпушчаных палітвязняў, блізкім якіх напярэдадні сказалі прыехаць і забраць іх. А выказаная Коулу адмова спыняць рэпрэсіі?

Пункт 3.

«Беларусь нельга пакідаць Расіі. І нельга кідаць людзей, якія застаюцца ўнутры краіны. Гэта 9 мільёнаў людзей, якія працягваюць там жыць. Незалежная і суверэнная Беларусь — неабходная ўмова архітэктуры еўрапейскай бяспекі. Ізаляцыя толькі ўзмацняе расійскі ўплыў.

Лёгка быць бязкампрамісным. Але бязкампраміснасць у FB не адкрывае турэмныя дзверы і не вяртае людзей дадому».

Я цалкам згодная. Але ў мяне пытанне: як перамовы дапамогуць абараніць 9 мільёнаў людзей? Як Еўропа і Амерыка могуць абараніць Беларусь ад расійскага ўплыву?

Няўжо Вы не бачыце, што лукашэнкаўская Беларусь прасякнутая гэтым атрутным уплывам, і ніякае «прамыванне страўніка» гэтаму не дапаможа.

Няўжо Вы наіўна лічыце, што калі Еўропа «прымі» Лукашэнку, ён адразу кіне свайго «вялікага расійскага брата» і ператворыцца ў еўрапейскага ліберала?

Вы пішаце, што лёгка быць бязкампрамісным. Марыя, я таксама прайшла праз калонію, хоць і ў больш лёгкім варыянце, чым Вы. Не, паверце, быць бязкампрамісным нялёгка, і Вы самі гэта ведаеце...