Прэм'ер-міністр Іспаніі абвясціў аб роспуску парламента
- 5.10.2026, 11:34
У краіне адбудуцца датэрміновыя выбары.
Прэм'ер-міністр Іспаніі Педра Санчэс абвясціў у панядзелак аб правядзенні пазачарговых парламенцкіх выбараў. Падставай стаў жыллёвы крызіс, аднак галасаванне адбудзецца і на фоне міграцыйнага крызісу, выкліканага прарывам дзясяткаў тысяч чалавек у іспанскі анклаў у Марока, паведамляе Bloomberg.
На мінулым тыдні парламент адхіліў план вырашэння жыллёвага пытання, які, як спадзявалася ўрад, меў супакоіць нарастаючыя сацыяльныя пратэсты. Неўдаволенасць даступнасцю жылля вылілася ў масавыя выступленні пасля таго, як 87-гадовую жанчыну з інваліднасцю выселілі з кватэры, у якой яна пражыла каля 70 гадоў. Дом набыла інвестыцыйная жыллёвая карпарацыя і запатрабавала ад арандатаркі плаціць значна вышэйшую суму. Пасля гэтага ў Мадрыдзе людзі пачалі начаваць у намётах на плошчах, пратэстуючы супраць падобных дзеянняў і патрабуючы ад уладаў заняцца жыллёвым крызісам.
Сацыялісты Санчэса прыйшлі да ўлады ў 2018 годзе, але ўвесь гэты час заставаліся ў меншасці. Іх цяперашні тэрмін, што пачаўся ў 2023 годзе і разлічаны да ліпеня 2027-га, аказаўся асабліва няпростым. Партыя Санчэса і нават ягоная сям'я апынуліся ўцягнутыя ў карупцыйныя скандалы, ўрад не справіўся з буйнымі паводкамі 2025 года, а мінулым летам каля 80 тысяч нелегальных мігрантаў прарваліся ў Сеўту, што выклікала новую хвалю грамадскага незадаволення.
Аднак Санчэс адмовіўся прымаць жорсткія меры ў Сеўце і крытыкаваць улады Марока, без папушчальніцтва якіх такі маштабны прарыў мяжы наўрад ці быў бы магчымы.
Паводле апытанняў цяпер лідзіруе правацэнтрысцкая Народная партыя: паводле дадзеных SocioMétrica, яе падтрымліваюць 33,9%, адзначае Bloomberg. Паводле слоў лідара партыі Альберта Нуньеса Фэйхоо, яна можа сфарміраваць урад з ультраправай партыяй Vox, за якую гатовыя галасаваць 18% выбарцаў. За сацыялістаў Санчэса прагаласавалі б 25,7%.
«Мы не можам працягваць ісці па тым шляху, па якім ідзём цяпер», — заявіў Фэйхоо ў пятніцу пасля адхілення жыллёвага плана ўрада.