У Расіі вырашылі абараняць НПЗ з дапамогай дырыжабляў

• 5.10.2026, 12:29

Натхніліся вопытам Першай сусветнай вайны.

У Расіі працягваюць шукаць спосабы абараніць свае НПЗ ад украінскіх удараў. На гэты раз у дзяржаве-агрэсары вырашылі выкарыстаць вопыт Першай сусветнай вайны.

У РФ пачалі выпускаць аэрастаты, якія, паводле задумы аўтараў, павінны «прыкрыць» нафтаперапрацоўчую інфраструктуру. «Ноў-хаў» больш як стагадовай даўнасці хвалілі дзяржаўныя прапагандысцкія СМІ, у прыватнасці выданне «Вести».

Прапагандысты распавялі, што ў Расіі пачалі тэставаць «спосаб абароны інфраструктуры прадпрыемстваў ад атак беспілотнікаў». Ідзе гаворка пра аэрастаты, паміж якімі нацягнутыя тросы і спецыяльныя кеўларавыя шнуры.

Паводле слоў кіраўніка маскоўскага аддзялення камісіі па паветраплаванні Расійскага геаграфічнага таварыства (РГО) Сяргея Бендіна, аэрастатныя ахоўныя загароды з сеткамі будуць прыкрываць найперш расійскія НПЗ.

Грошы на гэтую сістэму асвоіла расійскае навукова-вытворчае прадпрыемства «Спецрадыё».

Як вынікае з публікацыі, расіяне самі прызнаюць, што «натхніліся» вопытам Першай сусветнай: падобныя збудаванні выкарыстоўваліся яшчэ ў тыя часы.