«Мінсктранс» паскардзіўся на салідарнасць беларусаў з талонамі

• 5.10.2026, 18:22

У арганізацыі папрасілі пасажыраў не пакідаць прабітыя талоны ў салоне.

«Мінсктранс» папрасіў пасажыраў не пакідаць выкарыстаныя талоны на сядзеннях пасля паездкі. У арганізацыі патлумачылі: перадаваць ужо прабіты білет іншаму чалавеку нельга, а такая «дапамога» ў выніку скарачае выручку грамадскага транспарту.

У «Мінсктрансе» адзначылі, што часам пасажыры наўмысна пакідаюць талон у салоне, каб ім мог скарыстацца яшчэ хтосьці. Але прабіты білет дзейнічае толькі на адну паездку і не дзейнічае на наступным рэйсе па тым жа маршруце.

У арганізацыі лічаць, што з-за такіх паездак транспартнае прадпрыемства недаатрымлівае грошы.

«А менавіта з гэтых сродкаў фінансуецца рамонт рухомага складу, набываецца новы камфортны транспарт, падтрымліваюцца зручныя маршруты», — патлумачылі ў «Мінсктрансе».

Там дадалі, што ў выніку наступствы могуць адчуць і самі пасажыры — у выглядзе больш доўгага чакання транспарту або менш камфортных умоў паездкі.

«Калі ласка, не пакідайце талоны на сядзеннях — забірайце іх з сабой», — заклікалі ў арганізацыі.