Расіяне пабіліся з сербамі падчас таварыскага матчу

• 6.10.2026, 18:38

Відэафакт.

Падчас таварыскага матчу маладзёжных зборных (U‑21) Сербіі і Расіі ў Старой-Пазаве футбалісты ўчынілі масавую бойку.

Інцыдэнт адбыўся на 68-й хвіліне пры ліку 2:1 на карысць Сербіі. Усё пачалося пасля сутыкнення расійскага паўабаронцы Міхаіла Умнякова і серба Матыі Мітровіча.

Умнякоў неўдала выканаў падкат супраць Мітровіча. Серб нешта сказаў суперніку, пасля чаго расіянін павярнуўся да яго, і паміж футбалістамі пачалася патасоўка.

Праз некалькі секунд у канфлікт умяшаліся іншыя гульцы. На полі пачалася масавая сутычка, падчас якой футбалісты штурхаліся, біліся і хапалі адзін аднаго за горла. Разняць удзельнікаў спрабавалі партнёры па камандзе і трэнерскія штабы.

Пасля таго як канфлікт удалося спыніць, арбітр пакараў двух яго асноўных удзельнікаў. Умнякоў атрымаў прамую чырвоную картку, а Мітровіч — другую жоўтую, пасля чаго таксама пакінуў поле.

Сербія перамагла 2:1 і ўзяла рэванш за паразу 1:3 у першым таварыскім матчы, які адбыўся некалькі дзён раней. Мітровіч адкрыў лік на 34-й хвіліне з пенальці, а Марко Велічковіч на пачатку другога тайма падвоіў перавагу гаспадароў. Расія скараціла адставанне на 64-й хвіліне — Аляксандр Памалюк рэалізаваў пенальці.