Былы кіраўнік Apple Цім Кук прадаў акцыі кампаніі амаль на $64 млн

• 8.10.2026, 4:57

У той жа дзень акцыі прадаў і новы CEO Apple Джон Тэрнус.

Старшыня савета дырэктараў Apple і былы генеральны дырэктар кампаніі Цім Кук прадаў амаль 192 тыс. акцый кампаніі прыкладна на $63,7 млн. Такія даныя апублікавала Камісія ЗША па каштоўных паперах і біржах (SEC).

Здзелка адбылася 2 кастрычніка і была падзеленая на чатыры траншы. Акцыі прадаваліся па цэне ад $331,44 да $333,94 за штуку. Пры гэтым да здзелкі Куку было налічана больш за 374,5 тыс. акцый у межах праграмы ўзнагароджання RSU. Цяпер, пасля продажу, Ціму Куку належыць каля 3,24 млн акцый Apple. Продаж быў запланаваны — Цім Кук здзейсніў яго ў адпаведнасці з гандлёвым планам, які ён прыняў яшчэ 28 мая 2026 года.

У той жа час новы CEO Apple Джон Тэрнус прадаў больш за 25,4 тыс. акцый Apple прыкладна на суму $8,46 млн. Цана продажу знаходзілася ў дыяпазоне ад $331,38 да $334,05 за акцыю. Продаж таксама адбыўся пасля налічэння Тэрнусу 99,8 тыс. акцый RSU.

У дакуменце гаворыцца, што здзелкі праводзіліся паводле плана, які Тэрнус прыняў 21 мая 2026 года, у адпаведнасці з правілам SEC 10b5-1.

Гэта правіла Камісіі ЗША па каштоўных паперах і біржах, якое дазваляе інсайдарам законна прадаваць і купляць акцыі сваёй кампаніі паводле загадзя складзенага плана.

1 верасня Цім Кук пакінуў пасаду генеральнага дырэктара Apple. Яго змяніў ветэран Apple — былы віцэ-прэзідэнт па распрацоўцы апаратнага забеспячэння Джон Патрык Тэрнус. Пры гэтым Кук стаў выканаўчым старшынём савета дырэктараў. Тады ў кампаніі адзначалі, што ён будзе «аказваць дапамогу ў пэўных аспектах дзейнасці кампаніі, уключаючы ўзаемадзеянне з палітыкамі па ўсім свеце».