У Літве затрымалі дваіх замежнікаў, якія праніклі ў ЕС з Беларусі

• 8.10.2026, 6:49

Яны хацелі паляцець у Пізу.

У аэрапорце літоўскага Каўнаса перад адлётам у італьянскі горад Піза двое пасажыраў прад'явілі дакументы грамадзян Грэцыі і Балгарыі. Як высветлілася, гэта былі падробкі, а замежнікі прыбылі ў ЕС праз беларуска-латвійскую мяжу, паведаміла Служба аховы дзяржаўнай мяжы Літвы.

Літоўскія пагранічнікі 6 кастрычніка праверылі дакументы двух замежнікаў у аэрапорце Каўнаса — тыя чакалі пасадкі на рэйс у італьянскую Пізу. Мужчыны прад'явілі пасведчанні асобы 25-гадовага грамадзяніна Балгарыі і 28-гадовага грамадзяніна Грэцыі, але іх сапраўднасць выклікала падазрэнні. Праверка паказала, што дакументы не адпавядаюць стандартам.

«Абодва пасажыры мелі цяжкасці ў зносінах на англійскай мове, таму пагранічнікі прапанавалі ім запоўніць анкеты на балгарскай і грэцкай мовах, але замежнікі не змаглі гэтага зрабіць», — паведамілі ў пагранслужбе.

Урэшце яны прызналіся, што з'яўляюцца грамадзянамі Афганістана: аднаму 21 год, другі на год старэйшы.

«Афганцы трапілі ў нашу краіну звычайным шляхам: з Беларусі, незаконна перасеклі мяжу з Латвіяй і, будучы затрыманымі пагранічнікамі ў Літве, папрасілі прытулак», — паведамілі ў Службе аховы дзяржаўнай мяжы Літвы.

Замежнікі затрыманыя, распачаты крымінальныя справы па факце захоўвання падробленых пасведчанняў асобы.