Рубіо: Вайна супраць Украіны пайшла не так, як планаваў Крэмль

• 8.10.2026, 12:51

Сітуацыя зайшла ў стратэгічны тупік.

Дзяржсакратар ЗША Марко Рубіо лічыць, што вайна Расіі супраць Украіны пайшла не так, як планаваў расійскі дыктатар Уладзімір Пуцін.

Такое меркаванне амерыканскі дзяржаўны дзеяч выказаў грэчаскаму выданню Kathimerini .

Рубіо заявіў, што Пуцін не прадугледжваў такога развіцця падзей у вайне, калі армія РФ у 2022 годзе пачала поўнамаштабнае ўварванне ва Украіну. На яго думку, вайна пайшла не так, як планаваў гаспадар Крэмля. Рубіо лічыць, што існуе пагроза далейшай эскалацыі вайны, бо сітуацыя зайшла ў стратэгічны тупік.

Дзяржсакратар ЗША адзначыў, што стратэгічныя тупікі развязваюцца двума шляхамі. Першы шлях — пры дапамозе перамоваў. Другі шлях — эскалацыя канфлікту. Паводле яго слоў, заключэнне мірнага пагаднення было б добра для Украіны і Расіі, але «пакуль гэта выглядае цяжкадасягальным».

Дзяржсакратар ЗША сказаў, што асноўная праблема ў ўрэгуляванні вайны дыпламатычным шляхам палягае ў тым, што Расія хоча захапіць усю Данецкую вобласць Украіны, а Кіеў лічыць гэтае патрабаванне непрымальным.

Злучаныя Штаты баяцца дыверсійнай аперацыі ў суседняй з Украінай краіне, якая можа выйсці з-пад кантролю. Рубіо ў якасці прыкладу прывёў атаку марскіх дронаў і БПЛА на гандлёвыя судны каля ўзбярэжжа Балгарыі.