NYT: Расіяне адступаюць на Данбасе

• 8.10.2026, 13:21

Ашаламляльны поспех ЗСУ.

Украінскія войскі адваявалі частку тэрыторыі на поўначы Данбаса і сарвалі спробу расійскіх сіл акружыць гарады Слаўянск і Краматорск. Масква не першы месяц спрабуе дамагчыся поўнага кантролю над рэгіёнам, аднак падзеі на фронце для яе развіваюцца не паводле плану, піша The New York Times (пераклад — сайт Charter97.org).

Украінская контрнаступальная аперацыя, якая атрымала назву «Вівальдзі», цягнецца некалькі месяцаў. За гэты час расійскія войскі страцілі дзесяткі квадратных кіламетраў тэрыторыі. Кіеў спачатку стабілізаваў абарону, а потым нанёс удары па расійскай лагістыцы, чыгунках і складах.

Асобнай мэтай сталі аператары расійскіх беспілотнікаў. Украінскія вайскавыя выкарыстоўвалі радыёразведку, каб выяўляць іх пазіцыі, а затым наносілі ўдары. Для расчышчання праходаў праз мінныя палі выкарыстоўваліся робатызаваныя машыны.

Пасля падрыхтоўкі ўкраінскія падраздзяленні перайшлі ў наступ з выкарыстаннем бранятэхнікі і наземных дронаў. Расійскія сілы, паводле слоў украінскіх камандзіраў, часта перакідвалі падмацаванні ўжо пасля таго, як Кіеў заняў новыя пазіцыі.

На поўдні Данбаса сітуацыя іншая. Расія спрабуе вярнуць тэмп наступлення і штодня кідае ў атакі сотні вайскоўцаў. Пасля захопу Пакроўска ў лютым расійскія часткі павольна прасоўваліся на поўнач, але ўкраінская абарона здолела спыніць іх перад дасягненнем галоўных мэтаў.

Пры гэтым лінія фронту становіцца ўсё менш вызначанай. Расійскія вайскоўцы невялікімі групамі пранікаюць праз так званую «зону паражэння», насычаную беспілотнікамі, і спрабуюць замацавацца ў тыле Украіны.

«Сёння на Данбасе няма простай лініі фронту, якую можна правесці на карце», — заявіў украінскі камандзір Аляксандр Рашэўскі.

Масква працягвае сцвярджаць, што поўны захоп Данбаса непазбежны. Але расійскае наступленне прыкметна запаволілася. У верасні войскі РФ прасунуліся менш, чым за любы месяц з чэрвеня 2023 года.