Сакрэт даўгалецця знайшлі ў невялікай вёсцы на Сардзініі

• 8.10.2026, 13:48

Гэта новая «блакітная зона».

Невялікая вёска Балатана ў цэнтральнай Сардзініі можа стаць новай «блакітнай зонай» — месцам з незвычайна высокай працягласцю жыцця. Асабліва ўражваюць паказчыкі сярод жанчын, піша The Guardian (пераклад — сайт Charter97.org).

Даследчыкі Універсітэта Сасары і Універсітэта Алабамы вывучылі дадзеныя жыхароў, якія нарадзіліся ў Балатане з 1900 па 1925 год. Высветлілася, што 38 чалавек пражылі больш за 100 гадоў. Іх паказчык даўгалецця апынуўся на 57% вышэйшы за сярэдні па Італіі.

Яшчэ больш незвычайны вынік атрымалі сярод жанчын. З тых, хто дажывае да 70 гадоў, 13,8% дасягаюць стагадовага ўзросту. Гэта адзін з найлепшых паказчыкаў у свеце і другі вынік пасля Ганконга. У сярэднім па Італіі да 100 гадоў дажывае толькі 3,5% жанчын, якія дасягнулі 70 гадоў.

У 2025 годзе ў вёсцы з насельніцтвам 2266 чалавек налічвалася 12 даўгажыхароў старэйшых за 100 гадоў. Шэсць з іх памерлі, а ўсе шэсць, што засталіся, — жанчыны. Две найстарэйшыя жыхаркі ўжо дасягнулі 102 гадоў.

«Упершыню за больш чым 25 гадоў мы знайшлі месца даўгалецця па-за межамі традыцыйнай сардзінскай блакітнай зоны», — заявіў кіраўнік даследавання Джавані Марыё Пэс.

Навукоўцы пакуль не называюць адзінага сакрэту даўгалецця. Сярод магчымых фактараў — свежая мясцовая ежа, актыўны лад жыцця і цесныя сувязі паміж людзьмі. «Вельмі інтэнсіўныя і сапраўдныя сацыяльныя адносіны» суправаджаюць мясцовых жыхароў на працягу ўсяго жыцця, адзначыў Пэс.

У самой Італіі даўгажыхароў таксама становіцца больш. Па стане на лістапад 2025 года ў краіне налічвалася 23 548 чалавек старэйшых за 100 гадоў, пры гэтым 82,6% з іх — жанчыны.