Беспілотнікі атакавалі найбуйнейшы НПЗ Расіі ў Сібіры

• 8.10.2026, 14:18

Чуваць выбухі, з труб ідзе дым.

Беспілотнікі атакуюць найбуйнейшы нафтаперапрацоўчы завод Расіі — Амскі НПЗ.

Як перадае ASTRA, пра гэта паведамляюць мясцовыя жыхары.

«Амскі НПЗ атакуюць. Там з труб ідзе дым. Было чутна два выбухі», — кажуць яны.

Раней у Амскай вобласці абвясцілі пра беспілотную небяспеку. Улады заяўлялі пра магчымыя абмежаванні на выкарыстанне мабільнага інтэрнэту. Таксама абмежаванні ўвялі ў амскім аэрапорце.

Да гэтага на тэрыторыі ўсёй Уральскай федэральнай акругі быў уведзены рэжым небяспекі, звязаны з беспілотнымі лятальнымі апаратамі.

Атаку пацвердзіў губернатар Віталій Хоценка.

Нагадаем, 6 ліпеня ў Сілах абароны Украіны пацвердзілі паражэнне Амскага НПЗ, размешчанага на адлегласці амаль 2 500 км ад дзяржаўнай мяжы Украіны.

Амскі НПЗ — гэта апошні з 11 найбуйнейшых вытворцаў бензіну ў Расіі, які падвергся атаке ўкраінскіх дронаў.