Джэф Безос: развіццё штучнага інтэлекту дазволіць людзям працаваць тры дні на тыдзень

• 8.10.2026, 22:28

Заснавальнік Amazon даў аптымістычны прагноз.

Рост прадукцыйнасці дзякуючы штучнаму інтэлекту ў будучыні можа дазволіць амерыканцам працаваць тры дні на тыдзень або ўтрымліваць сям'ю на адзіны даход. Пра гэта заявіў заснавальнік Amazon Джэф Безос, перадае Forbes.

Мільярдэр не пагадзіўся з прагнозамі пра масавую страту працоўных месцаў з-за штучнага інтэлекту і дапусціў, што сем'і, дзе цяпер працуюць абодва сужэнцы, змогуць адмовіцца ад другога даходу. Па яго ацэнцы, развіццё тэхналогіі хутчэй прывядзе да дэфіцыту працоўнай сілы, чым да беспрацоўя. Скарачэнне каля 30 тыс. супрацоўнікаў Amazon за апошні год Безос растлумачыў перыядам актыўнага найму і рэзкім ростам штату пасля пандэміі COVID-19.

Акрамя таго, заснавальнік Amazon назваў штучны інтэлект «рэальнай» тэхналогіяй і дапусціў, што вакол яе цяпер фармуецца прамысловая бурбалка. Паводле яго слоў, нават калі інвестары страцяць грошы пасля краху гэтай бурбалкі, самі вынаходніцтвы нікуды не знікнуць, а ўкладанні ў тэхналагічныя праекты могуць прынесці карысць грамадству.