Пяць ачагоў пажару і нафтавы дождж: Украіна ўжыла новую тактыку для ўдару па НПЗ у Кстове

• 1.11.2026, 11:46

З'явіліся цікавыя дэталі масіраванай атакі.

У ноч на 1 лістапада Сілы абароны Украіны нанеслі чарговы ўдар па нафтаперапрацоўчым заводзе ў Кстове - адным з найбуйнейшых у РФ. У Сеціве ўжо з'явіліся кадры наступстваў атакі. Dialog.UA разбіраўся ў дэталях.

Удар пацвердзіў губернатар Ніжагародскай вобласці Глеб Нікіцін. Ён паскардзіўся на «масіраваную атаку БПЛА» на вобласць з выкарыстаннем сотняў дронаў.

«Значныя пашкоджанні атрымала прамысловае прадпрыемства ў Кстоўскім раёне… На перыяд правядзення аднаўленчых работ магчыма часовае адключэнне электрычнасці, зніжэнне параметраў гарачага водазабеспячэння і ацяплення», - напісаў Нікіцін.

Вядома, што гаворка ідзе менавіта пра Кстоўскі НПЗ - чацвёрты ў рэйтынгу па аб'ёмах перапрацоўкі ў РФ. OSINT-эксперт Supernova+ вызначыў, што пажары назіраюцца ў раёне ключавых для завода ўстановак АВТ-6 і АВТ-5.

«На дадзены момант дакладная лакалізацыя пашкоджанняў і ступень уздзеяння на вытворчыя магутнасці застаюцца невядомымі», - адзначыў эксперт. На месцы назіраюцца не менш за 5 ачагоў узгарання.

Судзячы па кадрах, Украіна перайшла да новай тактыкі больш масіраванага паражэння НПЗ, калі ўдары наносяцца адначасова ў розныя месцы завода для максімальнага пашкоджання. А тым часам жыхары Кстова ўжо пачалі скардзіцца на «нафтавы дождж».

Нафтапрадукты, якія падчас пажару падняліся з дымам у паветра, аседаюць і пакрываюць чорнымі масляністымі плямамі дамы, аўтамабілі, дрэвы і іншыя паверхні.