У ААЭ раскрылі імёны пілотаў, якія выратавалі рэйс Flydubai
- 1.11.2026, 13:27
Іх асобы сталі вядомыя пасля цырымоніі ўзнагароджання.
Улады ААЭ раскрылі імёны двух пілотаў, якія пасадзілі самалёт flydubai пасля спробы тэракту на рэйсе Дубай — Тэль-Авіў. Гэта Хэнсан Стывен з Фіджы і Роўэн Тут з ПАР. Іх асобы сталі вядомыя пасля цырымоніі ўзнагароджання 27 кастрычніка, паведамляюць The Times of Israel і Ynet.
Абодва знаходзіліся на борце як дадатковыя пілоты: ім належала выконваць зваротны рэйс. Пасля таго як другі пілот Хамам аль-Хамамі напаў з аварыйнай сякерай на камандзіра Сміта Маччхара, а пасажыры знешкодзілі нападніка, Стывен і Тут узялі кіраванне на сябе і пасадзілі пашкоджаны самалёт у саудаўскім Табуку.
Прэзідэнт ААЭ Мухамед бін Заід Аль Нахаян узнагародзіў іх і іншых членаў экіпажа ордэнам Заіда II ступені за мужнасць і забеспячэнне бяспекі пасажыраў. Як адзначыў Ynet, гэта адна з найвышэйшых грамадзянскіх узнагарод Аб’яднаных Арабскіх Эміратаў, якой звычайна ўзнагароджваюць дыпламатаў і высокапастаўленых чыноўнікаў.
Напад адбыўся 30 верасня. Падчас палёту самалёт спачатку перадаў аварыйны сігнал, а затым — сігнал аб захопе. Паводле даных Flightradar24, над Саудаўскай Аравіяй борт рэзка знізіўся з 10,4 да 5,2 км. Затым самалёт разгарнуўся над Іарданіяй і накіраваўся ў Табук.
9 кастрычніка генеральны пракурор ААЭ Хамад Сейф аш-Шамсі паведаміў пра прызнаўчыя паказанні аль-Хамамі. Паводле яго слоў, другі пілот планаваў здзейсніць тэракт у аэрапорце Бэн-Гурыён і сцвярджаў, што дзейнічаў самастойна, без саўдзельнікаў. У пракуратуры заявілі, што ён натхняўся тэрактамі 11 верасня 2001 года ў ЗША.
Ізраільскія ўлады былі гатовыя збіць самалёт, калі б узнікла пагроза яго выкарыстання для атакі, паведамляў CBS News са спасылкай на ізраільскіх чыноўнікаў. Паводле слоў суразмоўцаў тэлеканала, у краіне загадзя адпрацаваны парадак дзеянняў на выпадак падобных спроб захопу пасажырскіх самалётаў.
Аль-Хамамі раней адстранялі ад палётаў у Oman Air з-за занепакоенасці яго экстрэмісцкімі поглядамі, паведамляў CNN са спасылкай на крыніцы. Паводле даных суразмоўцаў ABC News, у 2024 годзе ў яго выявілі экстрэмісцкія матэрыялы, пасля чаго дазволілі працягваць працу на адміністрацыйнай пасадзе. Тэлеканал адзначаў, што слядзтву яшчэ трэба высветліць, як пасля ён атрымаў магчымасць лётаць у flydubai.
Паводле звестак The Wall Street Journal, аль-Хамамі наўмысна шукаў працу ў авіякампаніі, якая выконвае рэйсы ў Ізраіль. Газета пісала, што ён планаваў аналагічны напад яшчэ ў ліпені на тым жа маршруце Дубай — Тэль-Авіў, але адмовіўся ад задумы, паколькі перажываў за аднаго з членаў экіпажа.
Пасля інцыдэнту flydubai абвясціла пра прыпыненне рэйсаў у Ізраіль і назад на час расследавання. Перавозчык паведаміў, што рашэнне прынята па ўзгадненні з уладамі.