У Мінску вадзіцелі грамадскага транспарту праверылі квіткі ў пасажыраў

• 1.11.2026, 19:11

Як кантралёры.

«Мінсктранс» паведаміў пра акцыю, у межах якой вадзіцелі грамадскага транспарту праверылі квіткі ў пасажыраў на канчатковых прыпынках маршруту. То бок працавалі як кантралёры. Пра гэта таксама пісалі ў Threads, перадае smartpress.by.

«Мінсктранс», падкажыце, а даўно ў вас вадзіцелі падпрацоўваюць кантралёрамі? І на якой падставе на канчатковым прыпынку вадзіцель правярае і не выпускае людзей з транспарту?» — спытала мінчанка.

І ведамства адказала: «У адпаведнасці з Правіламі перавозак пасажыраў вадзіцель мае права ажыццяўляць кантроль аплаты праезду».

Яшчэ «Мінсктранс» адзначыў, што пры праверцы квіткоў высаджваць людзей можна праз адны дзверы. Гэта таксама прадугледжваюць Правілы перавозак пасажыраў.

Яшчэ адна карыстальніца Threads таксама застала праверку квіткоў вадзіцелямі: «Сёння двойчы назірала такую карціну і таксама была здзіўленая, бо такое даўно не практыкавалі, а на канчатковы я прыязджаю штодня».

Яшчэ адна мінчанка распавяла, як на канчатковай у трамваі правяралі аплату праязным. «Сёння таксама вельмі здзівілася, калі за адзін прыпынак папярэдзілі пра праверку, а на канчатковай трамвая ўсіх выпускалі праз пярэднія дзверы», — паведаміла яна.

Паводле слоў пасажыркі, яна паказала вадзіцельцы картку з праязным, а тая проста кіўнула галавой. «Бо магчымасці праверыць, ці сапраўды аплачана, у яе няма», — патлумачыла карыстальніца Threads.

У «Мінсктрансе» са свайго боку заявілі, што да такой акцыі большасць мінчукоў «паставіліся пазітыўна». Але дадалі, што некаторыя пасажыры негатыўна ўспрынялі «нязвыклы фармат кантролю».

Ведамства, дарэчы, адзначыла рост продажаў квіткоў у параўнанні з аналагічным днём мінулага тыдня. «Падобныя акцыі працягнуцца», — запэўніў перавозчык.