НАСА шукае спосаб уратаваць тэлескоп «Габл» ад падзення з арбіты

• 1.11.2026, 21:15

Пасля 36 гадоў у космасе.

Амерыканскае касмічнае агенцтва НАСА апублікавала запыт да камерцыйных кампаній. Агенцтва шукае ідэі па павышэнні арбіты тэлескопа «Габл» або правядзенні яго абслугоўвання.

Пра гэта паведамляе Gizmodo.

Удзельнікі павінны апісаць, як іх апараты змогуць бяспечна захапіць «Габл», падняць яго на вышыню ад 600 км і, пры неабходнасці, абнавіць абсталяванне. НАСА таксама гатова разгледзець план кіраванага схаджэння тэлескопа з арбіты.

Місія запланаваная на 2032 год. Кампаніі будуць самастойна планаваць яе, запускаць уласны карабель і, пры неабходнасці, набіраць экіпаж. Галоўная ўмова — «Габл» не павінен пацярпець.

«Габлу яшчэ належыць важная навуковая праца, і мы павінны разглядаць любую разумную магчымасць, каб ён працягваў функцыянаваць як мага даўжэй, — заявіў адміністратар НАСА Джарэд Айзэкман. — Калі існуюць інавацыйныя і эканамічна эфектыўныя спосабы падаўжэння тэрміну службы апарата, які ўжо знаходзіцца на арбіце, мы абавязаныя вывучыць іх дзеля амерыканскіх падаткаплацельшчыкаў і навуковай супольнасці».

Тэлескоп працуе на нізкай навакаляземнай арбіце з 1990 года і паступова губляе вышыню з-за зямнога прыцягнення. Паводле прагнозаў, у пачатку або сярэдзіне 2030-х гадоў ён увайдзе ў атмасферу і згарыць.

НАСА спрабавала вырашыць гэтую праблему яшчэ да запуску «Габла». У 2002 годзе арбіту тэлескопа крыху падняў шатл «Калумбія» падчас сэрвіснай місіі. Гэта магло падаўжыць тэрмін службы тэлескопа на некалькі гадоў, аднак падзенне было толькі адкладзена. З таго часу шатлы былі спісаныя, таму ў НАСА не засталося ўласных караблёў для правядзення такой аперацыі. Цяпер агенцтва разлічвае на актыўна развіваючыся прыватны касмічны сектар.

Прапановы ад бізнесу прымаюцца да 30 лістапада. Выданне Gizmodo адзначае, што НАСА шукае нядорагія рашэнні з-за скарачэння бюджэту.