ЕС прадоўжвае на два гады місію па падрыхтоўцы ўкраінскіх вайскоўцаў
- 10.11.2026, 10:45
У межах EUMAM падрыхтавана ўжо больш за 100 000 вайскоўцаў ЗСУ.
Савет Еўрапейскага саюза вырашыў працягнуць мандат Місіі ваеннай дапамогі ЕС у падтрымку Украіны (EUMAM) яшчэ на два гады — да 15 лістапада 2028 года, з выдзяленнем на гэты перыяд з бюджэту амаль 300 млн еўра. Таксама будзе створана прадстаўніцтва місіі ва Украіне для лепшай каардынацыі з украінскімі ўладамі і вайскоўцамі. Пра гэта гаворыцца ў прэс-рэлізе Савета ЕС.
Маштабы місіі будуць пашыраныя, каб засяродзіць увагу на ўроках, вынесеных з баявых дзеянняў, і на ўмацаванні ваеннай падрыхтоўкі дзеля падтрымкі абароназдольнасці Украіны. Акрамя таго, EUMAM працягне супрацоўнічаць з краінамі-партнёрамі па-за межамі Еўрасаюза, такімі як ЗША, Вялікабрытанія, Канада і Нарвегія, а таксама з міжнароднай «Кааліцыяй ахвотных» і НАТА.
EUMAM была створаная ў кастрычніку 2022 года для садзейнічання ўмацаванню ваеннага патэнцыялу Украіны, каб краіна магла абараняць сваю тэрытарыяльную цэласнасць і суверэнітэт, а таксама абараняць грамадзянскае насельніцтва ад узброенай агрэсіі Расіі. З моманту свайго стварэння ў кастрычніку 2022 года місія па запыце Кіева падрыхтавала на тэрыторыі краін ЕС больш за 100 000 украінскіх вайскоўцаў.
ЕС фінансуе ўмацаванне абароназдольнасці Украіны
У канцы верасня кіраўніца дыпламатыі Еўрасаюза Кая Калас паведаміла, што краіны ЕС дамовіліся размарозіць 6,6 млрд еўра з Еўрапейскага фонду міру (EPF), выдзяленне якіх з 2023 года ветавала Венгрыя. З гэтай сумы 4,7 млрд еўра будуць накіраваныя на кампенсацыю краінам ЕС выдаткаў на зброю і боепрыпасы, якія яны ўжо надалі Украіне, 1 млрд еўра — на сумесную закупку новага ўзбраення і 900 млн еўра — на фінансаванне EUMAM.
5 лістапада Еўракамісія накіравала Кіеву 4,36 млрд еўра ў межах крэдытнай праграмы Ukraine Support Loan. У тым ліку 658 млн еўра былі выдзелены на абаронныя патрэбы Украіны.
У Польшчы праходзяць першыя вучэнні «Кааліцыі ахвотных»
9 лістапада на тэрыторыі Польшчы пачаліся першыя сумесныя ваенныя вучэнні краін «Кааліцыі ахвотных» пад кіраўніцтвам Францыі і Вялікабрытаніі. Удзельнічаюць каля 2800 вайскоўцаў з 11 краін, уключаючы Германію. Мэта манеўраў — адпрацаваць механізмы забеспячэння доўгатэрміновай бяспекі Украіны пасля заканчэння вайны. Вучэнні працягнуцца да 22 лістапада.