Кушнер і Уіткоф накіруюцца ў Маскву, а затым у Кіеў

• 11.11.2026, 16:11

Перамовы, паводле прадстаўнікоў ЗША, былі складанымі.

Спецпасланнік прэзідэнта ЗША Джарэд Кушнер заявіў, што разам са Стывам Уіткофам накіруецца ў Маскву пасля перамоваў у ААЭ. Пра гэта ён сказаў на прэс-канферэнцыі па выніках трохбаковай сустрэчы ў Абу-Дабі, паведамляе «Радыё Свабода». Паводле яго слоў, пасля візіту ў расійскую сталіцу адбудзецца сустрэча з прэзідэнтам Украіны Уладзімірам Зяленскім.

Кушнер адзначыў, што мірныя дамоўленасці складаныя, але для іх дасягнення ёсць усе неабходныя складнікі.

Першы раўнд трохбаковых перамоваў з удзелам Украіны, ЗША і Расіі завяршыўся ў Абу-Дабі 10 лістапада. Украінскую дэлегацыю ўзначальвае кіраўнік Службы знешняй разведкі Рустэм Умераў, расійскую — памочнік Пуціна Уладзімір Мядзінскі. Ад ЗША прысутнічалі Уіткоф, Кушнер і камандуючы Еўрапейскім камандаваннем ЗША Алексус Грынкевіч. Паводле звестак Axios, спецпасланцы Трампа ўзначальвалі палітычную групу, а Грынкевіч — вайсковую. Бакі, паводле СМІ, абмеркавалі гарантыі бяспекі, патрабаванні Масквы і будучыню Украіны пасля вайны.