«Так руйнуюцца імперскія міфы»

• 11.11.2026, 17:22

Як беларусы «захапілі» Threads.

Усё больш жыхароў нашай краіны карыстаюцца роднай мовай пры зносінах у сацыяльных сетках. Беларус напісаў у Threads пра свае назіранні.

«Я заўважыў нешта цікавае, — адзначыў ён. — Беларусы захапілі Threads!

Спакойныя, упэўненыя ў сабе, сапраўдныя. Яны размаўляюць, мараць, будуюць планы і нават лаюцца — і ўсё гэта па-беларуску!

Ім адказваюць іншыя беларусы — шчырыя, яркія людзі. Далучаюцца і ўкраінцы — па-ўкраінску! І ўсе выдатна разумеюць адзін аднаго. Ніякія перакладчыкі не патрэбныя».

Аўтара допісу падтрымалі карыстальнікі з Беларусі і Украіны. Яны, як адзначае сайт Charter97.org, нагадалі пра тое, як адраджэнне роднай мовы звязана з незалежнасцю краіны:

— Дзесяцігоддзямі нам унушалі, што беларускай мовы нібыта не існуе, што ўкраінская — гэта «выдумка», а ўсе мы — «адзін народ». Няма мовы — няма народу. А калі няма народу, можна проста прыйсці, каб «вызваліць» яго і распаўсюдзіць «рускі мір». Такая логіка прывяла да фактычнай акупацыі Беларусі і з’яўлення танкаў на ўкраінскай зямлі.

Але паглядзіце хаця б на Threads: людзі з Мінска, Гродна, Кіева і Львава гавораць на розных мовах, аднак выдатна разумеюць адзін аднаго. Яны — суседзі, якія маюць права гаварыць так, як самі хочуць.

— Да мурашак! Абдымкі ад львоўянкі! Дзякуй, што вас так шмат свядомых і класных!

— Калі-небудзь згіне РФ і вусаты таракан, і мы станем яшчэ бліжэй адзін да аднаго. Вы ўсё правільна кажаце пра мову. Прывітанне з Харкава! Жыве Беларусь! Героям слава!

— Я трошкі дадам ад сябе. Нашы мовы — украінская і беларуская — гэта фільтр ад расійскай ботафермы. Яны нас не разумеюць, бо да славян не маюць ніякага дачынення.

— Так руйнуюцца імперскія міфы.