Экс-кіраўнік МЗС Украіны: расіяне адчуваюць, што ім хутка канец
- 11.11.2026, 18:59
Менавіта таму вярнуліся да перамоваў.
Экс-кіраўнік МЗС Украіны Уладзімір Агрызка у эфіры Радыё NV назваў галоўную прычыну, па якой Крэмль упершыню за дзевяць месяцаў пагадзіўся на перамовы ў Абу-Дабі.
— Прачытайце, што адбылося за апошні тыдзень з расійскай нафтаперапрацоўкай. Восем або дзевяць заводаў з 15–16 ужо не працуюць. Сёння вельмі ўдала прыляцела па порце Усць-Луга. Гэта адзін з ключавых партоў на Балтыцы. Пра Чорнае мора мы ўжо не кажам — туды ніхто не хоча заходзіць, таму што рызыкі каласальныя. І цяпер — я пра гэта казаў не раз — акцэнт пераносіцца на Балтыку. Вось цяпер прыляцела па порце Усць-Луга.
Думаю, заўтра ўдар прыйдзецца па Прыморску — або там ёсць трэці порт, які менш важны, але ўсё ж яны ўтраіх адыгрываюць ключавую ролю ў забеспячэнні расійскага экспарту.
Экс-кіраўнік МЗС Украіны заклікае пачытаць, што піша Мінфін РФ пра бягучы стан фінансаў:
— Бо ўсе выдатна бачаць, што сітуацыя ў расійскай эканоміцы працягвае пагаршацца. Пры тым надзвычай хуткімі тэмпамі.
Вы скептычна ставіцеся да таго, пра што я кажу, паколькі лічыце, што гэта можа адбыцца адным імгненнем. Не, такія працэсы адбываюцца паступова, але яны непазбежныя.
І калі ўявіць, што да канца месяца ўкраінскія Сілы абароны знішчаць яшчэ пяць–шэсць нафтаперапрацоўчых заводаў, што да канца месяца ўкраінскія Сілы абароны знішчаць яшчэ некалькі партоў на Балтыцы, то ў людзей з найбліжэйшага асяроддзя Пуціна ўзнікне простае пытанне: а што нам рабіць далей, дарагі вярхоўны галоўнакамандуючы? Нам няма чым запраўляць не толькі аўтамабілі грамадзянскіх асоб, але і тэхніку нашых «героічных» узброеных сіл. Нам няма чым ацяпляць памяшканні, паколькі няма мазуту для ЦЭЦ і таму падобнага. Цэны растуць, у людзей няма грошай. Што рабіць далей?
А далей — перамовы, пачатак перамоваў. Уласна, менавіта гэта цяпер і адбываецца. І гэты першы раўнд для мяне — як мінімум прызнак таго, што ў Расіі разумеюць: трэба нарэшце шукаць спосабы — праўда, са свайго, расійскага боку — завяршыць гэты працэс, таму што далей будзе горш.
І калі зараз Расія запланавала на наступны год 200 мільярдаў выдаткаў на вайну — пры тым, што ўжо цяпер дэфіцыт бюджэту складае каля 70 мільярдаў і будзе толькі расці, — гэта азначае, што грошы заканчваюцца і браць іх няма адкуль. А няма грошай — няма магчымасці весці вайну.
Менавіта таму пачынаюцца перамовы — не таму, што Расія такая добрая, а таму, што яна адчувае: хутка канец. Вось пра што гаворка.