У Іспаніі праходзіць першая за 14 гадоў усеагульная нацыянальная забастоўка

• 11.11.2026, 20:49

У Каталоніі пратэстоўцы сарвалі эфір, уварваўшыся ў студыю тэлеканала.

Каля сарака чалавек у масках уварваліся ў студыю тэлеканала RTVE ў Каталоніі, дзе мела выйсці ў эфір навінавая праграма «El Cafè d'Idees» журналісткі Джэммы Ніергі. Пачатак трансляцыі быў запланаваны на 8:00 раніцы, аднак з-за ўварвання запуск праграмы давялося адкласці, паведамляе 20minutos.

Пратэстоўцы сталі перад камерамі і разгарнулі транспарант з надпісам: «Жыццё не павінна каштаваць нам жыцця». Сваімі дзеяннямі яны перашкодзілі супрацоўнікам рэдакцыі выконваць працу па асвятленні падзей.

А 8:24 раніцы Ніерга выказала шкадаванне ў сацсетцы X, апублікаваўшы відэа. Журналістка нагадала, што спецыяльны выпуск быў прысвечаны забастоўцы. «Яны перашкодзілі нам рэалізаваць нашае права на інфармаванне і ваша права на атрыманне інфармацыі», — заявіла яна аўдыторыі.

Крыніцы ў RTVE ўдакладнілі 20minutos, што пратэстоўцы пакінулі студыю пасля 9:00, пасля чаго трансляцыя праграмы працягнулася.

Сёння, 11 лістапада, у Іспаніі праходзіць першая за 14 гадоў усеагульная нацыянальная забастоўка. Два найбуйнейшыя прафсаюзы краіны, CC. OO. і UGT, заклікалі работнікаў спыніць працу пад лозунгам «Заработная плата, жыллё, цэны» з-за падзення пакупніцкай здольнасці і вострага жыллёвага крызісу.