Бяспілотнікі правялі адну з самых маштабных атак на РФ з пачатку вайны ва Украіне
- 13.11.2026, 12:46
Пад агнём апынулася шмат рэгіёнаў.
У Расіі зафіксавана адна з найбольш маштабных атак украінскіх беспілотнікаў з пачатку вайны, якую яна вядзе супраць Украіны.
У ноч на пятніцу, 13 лістапада, над Астраханскай, Белгарадскай, Бранскай, Уладзімірскай, Валгаградскай, Варонежскай, Калужскай, Курскай, Ліпецкай, Арлоўскай, Растоўскай, Разанскай, Саратаўскай, Смаленскай, Цвярской і Тульскай абласцямі, Маскоўскім рэгіёнам, анексаваным Крымам і акваторыяй Чорнага мора былі збітыя 1198 украінскіх БПЛА, адрапартавала Міністэрства абароны РФ, паведамляе «Нямецкая хваля».
Толькі адзін раз з пачатку вайны расійскае ведамства заяўляла пра знішчэнне яшчэ большай колькасці дронаў за адну ноч — 1214 БПЛА у ноч на 29 кастрычніка.
У Валгаградзе гарыць НПЗ
Адна з мэт новай атакі ЗСУ — Валгаград. Маштабны пажар узнік на Валгаградскім НПЗ (ТАА «ЛУКОЙЛ-Валгаграднафтаперапрацоўка»), пішуць украінскія маніторынгавыя каналы і выданне Astra. Паводле падлікаў Exilenova+, гэта не менш як 13-я атака на гэта прадпрыемства з пачатку вайны.
Бяспілотнікі атакавалі Растоў-на-Доне і вобласць
Губернатар Растоўскай вобласці Юрый Слюсар заявіў аб атацы дронаў на рэгіён. Пажары ўзніклі «ў выніку падзення абломкаў БПЛА» ў абласным цэнтры і Аксайскім раёне, напісаў ён. У Растове-на-Доне паранены мужчына.
У выніку атакі былі пашкоджаныя дзевяць шматкватэрных дамоў, паведаміў мэр горада Аляксандр Скрябін. Паблізу іх увялі рэжым НС, дадаў ён. Таксама з-за атакі больш за 100 дамоў засталіся без цяпла, паведаміў мэр.
У Азоўскім раёне вобласці былі пашкоджаныя пяць прыватных дамоў. Акрамя таго, у Савецкім раёне Растова-на-Доне загарэлася «вытворчае памяшканне», напісаў Слюсар, не назваўшы пацярпелае прадпрыемства.
«Усяго мінулай ноччу ў Растоўскай вобласці знішчана больш за 120 БПЛА ў Растове-на-Доне і 10 раёнах вобласці: Матвеева-Курганскім, Бокаўскім, Каменскім, Тарасаўскім, Мілераўскім, Тацынскім, Усць-Данецкім, Азоўскім, Шолахаўскім, Чарткоўскім», — дадаў ён.
Тым часам мэр Масквы Сяргей Сабянін паведаміў, што ў напрамку сталічнага рэгіёна ляцелі 467 БПЛА. «Большая іх частка знішчана сістэмай СПА Міністэрства абароны на далёкіх рубяжах, 144 беспілотнікі нейтралізаваныя на подлёце да Масквы», — напісаў чыноўнік.