Расійская спадарожнікавая сістэма «Рассвет» сутыкнулася з вялікімі праблемамі
- 13.11.2026, 13:37
Украінская разведка даведалася падрабязнасці.
Расія спрабуе паскорыць разгортванне нізкаарбітальнай спадарожнікавай сістэмы сувязі «Рассвет», якую пазіцыянуе як уласны аналаг Starlink. Аднак гэты працэс суправаджаецца тэхнічнымі і вытворчымі цяжкасцямі.
Пра гэта паведамляе ГУР Мінабароны Украіны.
У прыватнасці, адчуваецца залежнасць ад замежных кампанентаў, праблемы з вывадам апаратаў на запланаваную арбіту і з распрацоўкай кампактных абаненцкіх тэрміналаў.
«Запланаваны на 2026 год трэці запуск апаратаў, паводле папярэдніх даных, скасавалі або перанеслі», — адзначаюць у ГУР.
Колькі спадарожнікаў «Рассвет» ужо вывела Расія
На дадзены момант Расія вывела на арбіту 30 спадарожнікаў двума партыямі — 23 сакавіка і 19 ліпеня 2026 года. Два апараты ўжо сышлі з арбіты.
З 30 спадарожнікаў 26 занялі ўстойлівае становішча на вышыні прыблізна 500–520 км. Ніводзін з іх пакуль не дасягнуў запланаванай вышыні 800 км. Астатнія апараты працягваюць манеўры для выхаду на мэтавую арбіту.
Маса аднаго спадарожніка складае каля 280 кг, габарыты — 2,7×1,8×0,6 метра. Адна з ключавых тэхналогій сістэмы — міжспадарожная лазерная сувязь, якая дазваляе перадаваць дадзеныя непасрэдна паміж апаратамі без пастаяннага звароту да наземнай інфраструктуры.
Да канца 2026 года Расія планавала павялічыць групоўку да 47–48 спадарожнікаў. У 2027 годзе разлічвае вывесці яшчэ 240 апаратаў, каб забяспечыць пакрыццё 94 % тэрыторыі РФ з хуткасцю перадачы дадзеных да 150 Мбіт/с.
Згодна з заяўленымі планамі, да 2031 года групоўка павінна вырасці да 408 спадарожнікаў, а да 2035-га — да 924. Для запускаў выкарыстоўваюцца ракеты «Саюз-2.1б» з касмадрома «Плясецк».
Наземная інфраструктура і абаненцкія тэрміналы
Асновай наземнага сегмента з’яўляецца галоўны цэнтр кіравання ў Маскве. Ён адказвае за кантроль спадарожнікаў, працу лазерных каналаў і маршрутызацыю трафіку.
Таксама прадугледжаная сетка наземных станцый у Маскве, Мурманску, Анадыры, Растове-на-Дану, Нарыльску, Жэлезнагорску і Паўднёва-Сахалінску.
У верасні 2026 года расійскі бок заявіў пра завяршэнне выпрабааванняў абаненцкага тэрмінала «Ультра». Паводле заяўленых характарыстык хуткасць загрузкі дадзеных можа дасягаць 650 Мбіт/с, а прылада павінна працаваць нават падчас руху носьбіта са хуткасцю да 250 км/г.
Да канца года плануецца перадаць заказчыкам каля тысячы такіх прылад.
У 2027–2028 гадах Расія плануе распрацаваць яшчэ пяць мадыфікацый тэрміналаў:
«Зямля»;
«Міні»;
«Прайм»;
«Вада»;
«Паветра» — авіяцыйны тэрмінал, прэзентацыя якога запланаваная на 2028 год.
Хто вырабляе спадарожнікі і ад чаго залежыць праект
Галоўным выканаўцам праекта з’яўляецца ТАА «Бюро 1440», якое ўваходзіць у склад «ІКС Холдынг». Да вытворчага супрацоўніцтва прыцягнутыя не менш як 46 расійскіх і тры беларускія кампаніі. Паводле прыведзеных даных, 22 прадпрыемствы, у тым ліку «Бюро 1440», не знаходзяцца пад санкцыямі.
Важным вытворцам крытычна важных кампанентаў з’яўляецца калінінградскае ААТ «ОКБ «Факел». Прадпрыемства вырабляе рухавікі малой цягі і сілавыя ўстаноўкі для спадарожнікаў.
У той жа час тэхналагічная база «Рассвета» залежыць ад імпарту электронных кампанентаў з Кітая. У прыватнасці, гаворка ідзе пра элементы для антэнных рашотак, наземных станцый і абаненцкіх тэрміналаў.
Сувязь з OneWeb і кіраўніцтва праектам
Куратарам праекта з’яўляецца кіраўнік «Раскасмаса» Дзмітрый Баканаў. Да прызначэння ён узначальваў ААТ «Спадарожнікавая сістэма «Ганец», якое супрацоўнічала з брытанскай кампаніяй OneWeb над разгортваннем інфраструктуры спадарожнікавага інтэрнэту ў Расіі.
Пасля пачатку паўнамаштабнага ўварвання ў 2022 годзе OneWeb спыніла супрацоўніцтва з расійскім бокам. У той жа час не выключаецца, што падчас папярэдняга ўзаемадзеяння Расія магла атрымаць доступ да асобных тэхнічных распрацовак і тэхналогій, якія пазней выкарыстала пры стварэнні ўласнай сістэмы.
Прыкметна, што канструктарскае бюро «Факел» раней вырабляла кампаненты для спадарожнікаў OneWeb, у прыватнасці рухавікі СПД-50М (SPT-50M). Цяпер гэта прадпрыемства вырабляе крытычна важныя кампаненты для апаратаў «Рассвет».