Паўночная Карэя змяніла сцяг упершыню за 78 гадоў

• 13.11.2026, 13:47

Навошта Кім Чэн Ын укароціў сімвал краіны?

Дыктатар Паўночнай Карэі Кім Чэн Ын змяніў дзяржаўны сцяг краіны ўпершыню за 78 гадоў. Палотнішча стала менш выцягнутым, а чырвоную зорку перасунулі бліжэй да цэнтра. Змены ўпісваюцца ў кампанію па фармаванні ўласнага палітычнага вобразу паўночнакарэйскага кіраўніка і дыстанцыяванні ад спадчыны яго дзеда — заснавальніка КНДР Кіма Ір Сена, піша The Wall Street Journal (пераклад — сайт Charter97.org).

Змены замацаваныя ў артыкуле 166 перагледжанай Канстытуцыі, апублікаванай на паўночнакарэйскім прапагандысцкім сайце «Наэнара». Паводле The Korea Times, суадносіны вышыні і шырыні сцяга змяніліся з 1:2 на 1:1,65.

Асноўныя элементы захаваліся: шырокая чырвоная паласа, белыя і сінія палосы, а таксама чырвоная пяціканцовая зорка ў белым крузе. Згодна з афіцыйным тлумачэннем, чырвоны колер сімвалізуе кроў змагароў за незалежнасць ад Японіі, белы — вернасць народа кіраўніцтву і кіруючай партыі, сіні — мір, сяброўства і суверэнітэт краіны.

Папярэдні сцяг быў распрацаваны пры ўдзеле савецкіх спецыялістаў пасля Другой сусветнай вайны. Аднак паўночнакарэйская прапаганда прыпісвала яго стварэнне Кіму Ір Сену. Цяпер перагляд сімволікі стаў часткай больш маштабнага курсу Кіма Чэн Ына. Раней ён адмовіўся ад былой палітыкі аб’яднання з Паўднёвай Карэяй і змяніў дзяржаўны гімн, прыбраўшы згадванне Карэйскага паўвострава.