Стала вядома, дзе расійская армія панесла найбольшыя страты ва Украіне

• 13.11.2026, 15:14

Баі за кожны з гэтых гарадоў аказаліся больш крывавымі, чым уся савецкая вайна ў Афганістане.

Колькасць загінулых расійскіх акупантаў ва Украіне можа дасягнуць 650 тысяч да канца года. Найбольш крывавыя баі пры гэтым прыпалі на Аўдзееўку, Пакроўск і Бахмут.

Такія высновы Financial Times зрабіла на падставе вывучаных даных Росстата, выкрадзеных хакерамі.

Да жніўня 2026 года агульная колькасць расіян, якія загінулі ў выніку вайны супраць Украіны, складала каля 550 тысяч чалавек, з іх прыкладна 410 тысяч смерцяў непасрэдна звязаныя з вайной, яшчэ каля 12 тысяч журналісты ідэнтыфікавалі паводле дадатковых прыкмет, а 42 тысячы — паводле матэрыялаў судовых разглядаў аб прызнанні зніклых без вестак загінулымі.

Калі тэмпы смяротнасці, зафіксаваныя ў студзені, захавюцца да канца года, колькасць загінулых можа павялічыцца да 650 тысяч. Пры гэтым рэальны паказчык можа быць вышэйшым з-за затрымак з рэгістрацыяй смерцяў.

Паводле даных Росстата, каля 120 тысяч загінулых прыпадае на раёны Аўдзееўкі і Пакроўска, яшчэ 48 тысяч — на суседні Бахмуцкі раён.

У FT адзначаюць, што баі за кожны з гэтых гарадоў аказаліся больш крывавымі, чым уся савецкая вайна ў Афганістане за дзесяць гадоў.

Аналіз таксама паказаў змену ўзросту загінулых. У 2025 годзе сярэдні ўзрост расійскага вайскоўца, які загінуў на вайне, складаў 40 гадоў супраць 34 гадоў у першы год уварвання.

Найбольш шматлікай групай сталі мужчыны 35–44 гадоў. На іх прыпала каля 158 тысяч смерцяў. Доля загінулых ва ўзросце 18–24 гадоў скарацілася прыкладна да 10%.