У Расіі пачаліся масавыя нявыплаты заробкаў камунальнікам
- 13.11.2026, 20:09
У Якуціі працаўнікі ЖКГ амаль тры месяцы не атрымліваюць зарабленыя грошы.
На фоне праблем з бюджэтам у Якуціі абвастрыўся зарплатны крызіс у сферы камунальных паслуг, на што звярнулі ўвагу «Людзі Байкала», піша The Moscow Times.
Паводле звестак міністра ЖКГ і энергетыкі рэспублікі Сяргея Кірава, грошы за другую палову верасня і першую палову кастрычніка не атрымалі супрацоўнікі 17 з 28 філіялаў ГУП «ЖКХ Рэспублікі Саха (Якуція)». Запазычанасць пагашаюць «па меры паступлення выручкі прадпрыемства», заявіў кіраўнік ведамства. Супрацоўнікі, што засталіся без заробку, запісалі відэазварот з «крыкам душы».
«Нам не плацяць заробак амаль тры месяцы. Мы вымушаныя працаваць па 12 гадзін, ацяпляць і чакаць свае сумленна заробленыя грошы. У вёсцы, дзе я жыву, няма вакансій. Пакуль ГУП „ЖКХ РС (Я)“ корміць абяцаннямі, у маёй сям’і штодзённа павялічваюцца даўгі. У нас крэдыты, я ў доўгах перад сваякамі, сябрамі, мне няма чым карміць дзяцей. З-за затрымак заробку я не магу своечасова аплачваць камунальныя паслугі», — кажа на відэа адзін з рабочых. Паводле яго слоў, усе спробы дамагчыся атрымання заробку былі праігнараваныя кіраўніцтвам.
«Дзірка» ў бюджэце Якуціі ў 2026 годзе дасягае 12,8 млрд рублёў пры выдатках у 349,8 мільярдаў. Раней з-за недахопу сродкаў дэпутат рэгіянальнага заканадаўчага сходу Васіль Ягораў заклікаў паставіць на паўзу будаўніцтва моста праз раку Лену коштам 175 млрд рублёў і адмяніць рашэнне аб выдзяленні на гэтыя мэты 11 млрд рублёў у 2027 годзе. Ён абгрунтоўваў гэта, у тым ліку, ростам запазычанасці па заробках перад супрацоўнікамі прадпрыемстваў ЖКГ.
Раней жонкі рабочых, што засталіся без грошай, накіравалі на адрас прэзідэнта Уладзіміра Пуціна калектыўны ліст пра затрымкі заробку, якія, паводле іх слоў, сталі штомесячнымі. Аўтары звароту заявілі, што ў крытычнай сітуацыі апынуліся сотні сем’яў па ўсёй рэспубліцы. «У адказ на ўсе пытанні кіраўніцтва толькі разводзіць рукамі, спасылаючыся на „недастатковасць паступлення даходаў за камунальныя паслугі“», — скардзяцца жанчыны.
Мясцовы дэпутат Віктар Фёдараў запатрабаваў ад уладаў Якуціі ў найкарацейшыя тэрміны пагасіць даўгі па заробку. Ён заявіў, што гэтая сітуацыя — «прамое наступства шматгадовага недафінансавання галіны». «Дзяржава не плаціць прадпрыемству, прадпрыемства не плаціць качагарам. А адказваць за нявыплату заробку давядзецца кіраўніку ГУП „ЖКХ“. Зручна атрымліваецца: даўгі назапашвае адзін бок, а адказнасць перакладаюць на іншы», — сказаў адзінарас.